İ cito Rusoyto Ortodoksoyto wu Vatikan makadlın du macırbo kımcamıs caynothe calu mede dkowe ba Mşihoye

İ cito Rusoyto Ortodoksoyto wu Vatikan, makadlın du mede dkowe cala Mşihoye bu qlimo du madınho mescoyo qtolcamoyo.  Bebzabno, atre gabe makadlın dıklozım dımhaydi afulhonaththe bnişo dmınfıq moro li ithutho da Mşihoye bu madınho mescoyo.

Mşalo citonoyo Rusoyo b’darğo celoyo mırle “i cito Ortodoksoyto d’Rusya kfılğo camu papa du Vatikan i yasifuthayde li aykanoyutho da Mşihoye bu qlimo du madınho mescoyo wi lothnihutho dkıtle lafu dactidaththe bu qlimo”.

İ maqırhonuthathe hıwole u rişono du ferco danesore baroye di fatıryarxutho d’Mosko hasyo Helaryon dmıstaqbalwo mu papa Mor Fransis i şabtho dşaficina bu benyono du Vatikan. Hasyo Helaryon mabdele socurutho l’Roma bi ohnutho dşafıc arbac ışne calu lqoyo makthabzabnoyo dhawiwo bayn di qadişutho du papa Mor Fransis Qadmoyo wi qadişutho du fatıryarxo d’Mosko udkule Rusya Mor Kiril Qadmoyo.

Bıthır mu l’qoyano, hasyo Helaryo bi maqırhonutho dhule lu ajans du Vatikan News, mırle “i cito Ortodoksoyto d’Rusya kula naqla kfılğo ukmıştawtıfo camu papa bi sbutho di lothnihutho dkıtle lafi aykanoyutho da Mşihoye bu madınho mescoyo. Ulaşan dha domır i şrolutho u medanoyo i celtho rişoyto dlaqino adyawma camu papa bu Vatikan”.

Hasyo Helaryon dmamtele lu bolo du mede dkowe ucdo la Mşihoye du madınho mescoyo qtolcamoyo ba melani mdawamle “u tboco froso wa folitiqoye du macırbo hani zabno yarixo kmacımsi caynothaye calu mede dkowe cala Mşihoye du madınho mescoyo udlımbahsi acle. Elo Mor Fransis u fatıryarxo Kiril dilonoyith mbayn da qamoye wın dmırlın: i aykanoyuthathe tehdidyo la Mşihoye, ubebzabno a’tre gabe mnasewolın dgırşi u zuhoro du tboco froso li sbutho da Mşihoye du madınho”.

Bu huthomo di maqırhonuthayde, u mşalo citonoyo Rusoyo hasyo Helaryon mırle “klozım i cito Ortodoksoyto wu Vatikan dsaymi u mede dıknofıl aclaye, laşan dmınfıq moro li ithutho da Mşihoye du madınho mescoyo”.