İ cito Suryoyto Qatholiqoyto bu buyono dmofaqla hıthımla i Sunados

I Sunados mqadaşto di cito Suryoyto Qatholiqoyto mkamela a’ytawyothayda l’şabtho bu athro d’Lebnon.

Ba ytawyothani, a’hsayo di Sunados dıdrışlın i aykanoyutho da marciyothaththe, kalınste bu zyudo dkulle calu kriz d’Lebnon ucalu qento di golutho da Mşihoye mu madınho.

Bu siqumo d’12 uhul 18 bu yarhano, i Sunados mqadaşto di cito Suryoyto Qatholiqoyto layimo bu qentrun fatıryarxoyo bi daydo d’Sayıdıt Alnajat bu Turo d’Lebnon.

Ba ytawyotho di Sunados, a’hsayo mqadamlın taşrore rwihe cala marciyothaththe d’Lebnon, Suriya, u Ciraq, u Xaliç Caraboyo, Urışlem, Yurdnon, Mısır u Turkiya wu mede d’athi b’rişaye mfothıd da qrobe uda krize mşahılfe.

Bebzabno, an’abohe di cito Suryoyto kalın bu zyudo dkulle cala qetre u casqıwotho dkımmathli qento calu dactid da Mşihoye du madınho, dilonoyith i goluthaththe dkımdawmo mfothıd di aykanoyutho folitiqoyto, momunoyto udi mşaynutho du qlimo. Callathe, a’hsayo di Sunados sımlın qroyto la n’athrawotho u şultınwotho du madınho, dfılhi b’şıkıl çıddi laşan dmitaklın a’qrobe udmınfıq mqabıl du mafhum di tuhmonoyutho udu furşono bayn da mathhabe tawdithoye.

Camgabıdathe, a’rişone da marciyotho maqımlın teşmışto dilonoyto laşan u athro d’Lebnon dıkloqe ucdo krize bu haqlo momunoyo, kenşoyo, hulmonoyo u yulfonoyo, u tlıblın kuşore li şultonutho hatho dkımrayşanla Nejib Miqti. Elo bebzabno a’hsayo mcalayo mahwelın dkıtne fsoqsabro cal dkımdawım u dyoşo da zedqe da Suryoye d’Lebnon dlatlın ulo mathlono b’gawıd di şultonutho hathto, udlıkmitahwelın woliyotho celoye ba şutose ruşmoye mdinoye, folhoye udu bethdino d’Lebnon. A’hadome di Sunados sımlın ste qroyto li şultonutho dfılho b’surhobo, laşan dmitaxifo i casqutho du camo d’Lebnon, udmitagle cali şrorutho du furqoco rabo du lmino d’Bayrut. M’gabo hreno, a’hsayo sımlın qroyto la mşale folitiqoye dmisım buqore laşan dmitagle cali ctidutho da zuze da bnaymothoye dmanıhbi ma banqat d’Lebnon, ubebzabno makadlın dıklozım dmisomi a’guboye bu zabnaththe bu yarho d’Odır dıbqamuthayna.

Mxasra hreto, i qadişutho du fatıryarxo Mor İğnatiyos Yusıf Tlithoyo Yunan mbayanle u rişhsayo d’Boğdod Mor Afram Yusıf Cabba mdabrono fatıryarxoyo li marcitho d’Mawsal ud’hedora, bıthır mıdmaqbele isticfa du hasyo Mor Yuhanna Bıtrıs Muşe cal dşafıc u cımro qonunoyo di mdabronuthayde.

Camgabıdathe, a’hsayo di Sunados sımlın qroyto lu camaydan dkıtyo bi golutho dnofıq moro li haymonuthayde uli marduthayde, udkole b’fothıd dku celtho du fşorayde ba n’athrawotho du macırbo, ubebzabno mqadamlın tawdiyotho lu camaydan di golutho cal dıksonıd kul naqla an’ahunonayde du madınho.