İ claymutho d’ESU mtayabla turgomo calu maşıqlo du yulfono Suryoyo bu qlimo di Gozarto d’Suriya

İ claymutho du Huyodo Suroyo d’Urifi ESU, mtayable turgomo cali aykanoyutho du garbay madınho d’Suriya, ucalu maşıqlo du yulfono Suryoyo bu qlimo di Gozarto Bethnahrin d’Suriya.

Bu turgomano dhadırle nahire, malfone, u noqufe d’ESU, mahke ebe bırwihutho cali ulsoyutho du şbilo du leşono Suryoyo dıkmitaqre ba madraşyotho dilonoye du camaydan bi Gozarto.

Bu insiyativ di claymutho du Huyodo Suroyo d’Urifi ESU, mtayıb athmıl bu benyono du Huyodo bi mditho d’Bruxel, turgomo cali aykanoyutho gawonoyto du garbay madınho d’Suriya, ucalu maşıqlo du tewlifo du şbilo Suryoyo ba madraşyotho du camaydan bu qlimo di Gozarto.

U turgomano dımşarele bi şuctho da tarte d’falgıdyawmo mdawamle hedor şuctho u falge, bi mdabronutho du mathlono d’ESU bı Beljika gelyunoro David Vergili.

Lu turgomano, mıştawtafle u rişono zawgoyo d’ESU Fahmi Vergili u hul 25 fatsufe mu camaydan, baynothaye malfone du leşono Suryoyo, şamoşe, nahire u noqufe d’ESU.

Lu turgomano mıştawtafle ste m’Suriya bu darbo du Skayp, u mşalo di tarbitho uda buhone Kino Gabriel wu mşalo du şutoso d’Olaf Taw Jalinos Cisa.

Gabriel bu mamlo dsımle mahkele cali aykanoyutho noşoyto u folhoyto du garbay madınho d’Suriya, u mawdacle dı Turkiya wa çatawiyayda maqşelın ba yawme haroyani a’hçomaththe cala qıryawotho du camaydan du Xabur udı Tel Tamır, ubebzabno  makadle da mharbone du Mawtbo Folhoyo Suryoyo d’MFS kobın funoyo la hçomani uknıfqi moro la mulkone du camaydan bi fnitho. Camgabıdathe, Gabriel mahkele cala fulhone dsımla i mdabronutho yothoyto mu zabno di mşatsonuthayda bi şato da 2013 uhul ucdo, wu nişo dkıtla lafu dactid.

M’gabo hreno, u mşalo d’Olaf Taw Jalinos Cisa mahkele cala şbile du yulfono Suryoyo dkibın kthowe du qeryono udu makthabzabno du camaydan dıkmitaqrın la yolufe da madraşyotho dilonoye du camaydan mu sedro qadmoyo hulu sedro rbicoyo. Cisa mahkele ste cala qetre dnafıqwole u şutoso d’Olaf Taw mhın farsufe dkalınwo mu zabno du qyomo dımdewo bi şato da 2018 xıd terpılto qum du tewlifo da şbile du leşono Suryoyo laşan manfacat dhın hayle. Camgabıdathe, Cisa mawdacle dımte ucdo l’qyomo camu mawtbo citonoyo da Suryoye Ortodoxoye di Gozarto, dmitawlıfi a’şbile Suryoye ba madraşyotho kulle du camaydan uda n’Armınoye di Gozarto, u grışle ste u zuhoro cali ulsoyutho rabtho da şbilani dkımmathli u asas di hiyoyutho umthoyto du camaydan udıksaymi u garanti du nfoqo du moro li şkihuthayde b’Suriya.

Lfuth u mşalo d’Olaf Taw, a’şbile du leşono Suryoyo kmitaqrın ucdo ba madraşyotho kulle di mdabronutho yothoyto, ub’20 madraşyotho hrene dkıtne dilonoye du camaydan, baynothaye tmone madraşyotho di cito Suryoyto Ortodoksoyto, tarte di cito Suryoyto Qatholiqoyto, tarte di cito Othuroyto, hdo di cito Kaldoyto, tarte di cito Protestanoyto u arbac madraşyotho da n’Armınoye. Cisa grışle ste u zuhoro cal madraşto du camaydan dısxiro bi mditho di Dırbesiye cal dlıfayış eba comure mu camaydan, u madraşto hreto dısxiro bi mditho d’Rişcayno dkıtyo kbişto mu gayso dı Turkiya.