İ mdabronutho yothoyto du garbiyo udu madınho d’Suriya gıdhowela ytawyotho cami şultonutho d’Mosko ucami mdabrontuho d’Waşington

İ mdabronutho yothoyto du garbiyo udu madınho d’Suriya, ba kmo yawme dıbqamuthayna kmıntır dhowela ytawyotho cami şultonutho d’Mosko ucami mdabrontuho d’Waşington.

Kmahwe an’athrawotho d’Astana Rusya, Turkiya wu İran fayış kfıhmi du şroyo du kriz folitiqoyo d’Suriya laybe dhowe dlo mi şawtofutho di mdabronutho yothoyto.

Mabuce mu mawtbo d’Suriya demoqratoyto d’MSD, maglelın liholo dı taşdarto mu mawtbo gıdsaymo calqariwo socurwotho l’Amerika ul’Rusya, laşan dhowela lqoyotho cam  mşale ma tre athrawotho. A’socurwothani gıdothın luhwoyo lfuth i qroyto dsımwola i şultonutho d’Mosko li mdabronutho yothoyto du garbiyo udu madınho d’Suriya.

A’mabuce d’MSD lımaglelın lu tboco froso cali tahrazto da fulhone uda sebwotho dgıdmıdroşi ba socurwotho dıkmıntır dsamlın u mawtbo d’Suriya demoqratoyto la n’athrawotho d’Rusya ud’Amerika. Elo kmisım texmin ba ytawyothani gıdmıdroşo i aykanoyutho du garbiyo udu madınho d’Suriya, i aykanoyutho gawonoyto wa darbone du şroyo du kriz folitiqoyo d’Suriya, an’esore cami mdabronutho yothoyto wa hçome dıksaymolın Turkiya cala fenyotho du garbiyo udu madınho d’Suriya.

A’socurwothani d’MSD gıdmisomi meqım mi lqoyto dıkmıntır dhuyo bayn du mşalo du qlimo du madınho mescoyo udu garbiyo d’Afriqya du mawtbo di mşaynutho umthoyto d’Amerika Bret MacGurk wu mcadrono du waziro di baroyutho d’Rusya Sergey Verşinin wu mathlono du rişqutno d’Rusya bu athro d’Suriya Alexander Lavrantiyev.

Anathrawotho da knuşye d’Astana Rusya, Turkiya wu İran hani ışne kımnasın d’şorın u kriz folitiqoyo d’Suriya dlo mi şawtofutho kamılto da came mşahılfe du athro, u mawxa ste an’athrawothani khozın ucdo d’ulsoyoyo dmaydi lu hşowo i sbutho di mdabronutho yothoyto dkıtyo bnayqyomo d’Amerika, udhowelın fhome acma, bnişo dmibayno i xarita du şroyo du kriz d’Suriya.