İ Mdabronutho yothoyto du garbyo u du madınho d’Suriya mawraxla u zabno du karanten

İ Mdabronutho yothoyto du garbyo u du madınho d’Suriya, mawraxla u zabno du karanten l’19 bu yarhano u sımla qroyto la bnaymothoye kulle, dmaydi a tedbirathe mqabıl du kewo di Corona.

 U karantenano dkıtyo belhude cal dukotho mbayne, gıdmdawım 15 yawme-awkith me athmıl dkıtwe 5 bu yarhano uhol 19 bu yarhano d’Konun u haroyo. U amrano di Mdabronutho yothoyto hiw, lfuth u fusqono dmıdwola i Sictho du Kriz.

İ rişonutho zawgoyto du Mawtbo Mşablono di Mdabronutho yothoyto fsıqla dmawrıxo u zabno du mnoco du nfoqo du camo u karanten l’19 bu yarhano mi celtho dıkmdawım u virusano di Corona dtofe bu garbyo u bu madınho d’Suriya. U fusqonano di Mdabronutho yothoyto şafıc athmıl la haye u gıdmdawım 15 yawme.

Bebzabno i Mdabronutho yothoyto sımla qroyto la bnaymothoye du qlimo, dhowın mahise u dmıstacmıli kul tedbir leşan dlotofelın u virusano di Corona. U karanten mahıt cala dukotho di Mdabronutho yothoyto kule u calathe a dukane du zebono du muklo u di yariqutho gıdfayşi ftihe lholi şoctho da 5 d’casriye elo a pazare rabe gıdfayşi ftihe.

A madraşyotho kule, a botaysawbo wa şutose du yulfono gıdfayşi ftihe b’şart dmimıd tedbire casye. A base gıdmdawmi bu mazlo u mathyathe beyn da dukotho di Mdabronutho yothoyto. A dukotho di slutho kule gıdfayşi sxire belhude yawme d’Cruto u yawme d’Huşabo kibe dmisım slutho ebeye tahte d’tedbire casye.

Mahıt mnoco cala ltome xıd mathlo mıştawotho, cufoye, knuşye u lumode u gıdmitahwe msombrişo-jıza lkul ha dgıhodır. A bnaymothoye wa falohe da şutose di Mdabronutho yothoyto klozım dmıstacmıli maskat u dmaydi a tedbirathe bkul duktho dkıtne hol dtoyım u pandemiano. Kul mdabronutho yothoyto u mdinoyto kıtla zedqo dmaydo fusqono bi sbuthathe di Corona en dlowe saqıbloyo la fusqone di Mdabronutho yothoyto.