İ mdito d’Bobıl kobo ağono leşan dımhafdo calu timeyda

İ mdito makthabzabnoyto du camaydan Bobel bu Iraq, kobo ağono leşan dımhafdo cal ha ma dumore dfayış mi britho catıqto.

 İ mditathe dşafico tahte da rağlotho hem ba qrobe u ba taxtuşe dhawın u hemste mi celtho da gunhe dukyono, trelın a dukotho catiqotho bu qento du shofo.

Babylon aw Bobel mahtowa bi lohitho Emwothoyto di yortutho d’UNESCO ba 2019, bnişo dmihafıd cali mditathe wi yortutho catırto dkıtwo eba. Bobel adyawma kobo ağono leşan dfayşo cali rağlo-me zabne l’zabne kbişo, mahrıw u gniw athare, naqlat nafıq taxtuşe u naqlat’ste, a mattre wi hawa du madhıbro, m’atharlın mrimono acla.

Bobel kıfayşo 50 milat mu taymno di arişkoyto Boğdod. Elo an arkeolog, heş kımnasın dımhafdi i mditathe wa syome dkito eba dıkducri l’meqım 4 alfo eşne mu shofo. Ha man arekolog komır; Hathe yortutho du Cıraq’yo u kıtlan sniqutho rabtho, dımhafdina acla u dnufqinala moro.

U arkeolog komır; Bobel, latyo belhude makthabzabno catiqo, elo makthabzabno d’camo’yo u kmithakıro bu kthowo qadişo da Mşihoye. Layt noşo dlıkodıc i mamlaxtho da Bıbloye aw a qonune d’Hammurabi-camo dkıtwe yadıcthono bhaqle frişe. İ mamlaxtho da Bıbloye, madcafwola u nafilowa bıthır 539 meqım me Mşihoyo ma Fırsoye.

Meqım doro, an arkeolog Almanoye maglewolın calan athare dkıtwın tmire uha mani’ste u tarco d’İshtar’we, a şurone di mdito uğer. Xıd ğalabe dukotho catiqotho du akeoloji du Cıraq, Bobel’ste kıhuzyo adyawma husrono u calathe mabdelın an arkeolog fulhone, leşan dtorın an atharani cali rağlo.