I mşalonitho di siyase baroyto du Huyodo d’Urifi Kaya Kalas, makadla du Huyodo ksoyım hboso cali şultonutho zabnoyto dı Darımsuq laşan dımhalqo dawsat trise udmafito la haye a’şudoye dkobo

BRUKSEL – I mşalonitho di siyase baroyto du Huyodo d’Urifi Kaya Kalas, athmıl hula maqırhonutho la gelyunore calu şıkıl du qedomo dkıtla i şultonutho zabnoyto d’Suriya dı Darımsuq. Bi sbuthathe Kalas mırla “akidyo kıtlan cayni zuctho dkıtxu mi şultonutho dı Darısmuq. I şultonuthathe hul ucdo kımmalılo a’medone towe, elo hal gıdmafito i towuthathe la haye aw lo yo. U medano drışlan cama n’athrawotho hadome kulle du Huyodo d’Urifi”. 

Bebzabno, i mşalonitho Urifoyto mathkarla du Huyodo d’Urifi kıtle u nişo dmitarkıwo i şalyutho b’gawıd du athro d’Suriya, u hawxa mdawamla “u camo d’Suriya şafıc b’ğalabe teşniqe. Suriya athroyo dkıtle fothotho mşahılfe ukhobış b’gawe menyono celoyo ma came frişe, mawxa klozım a’camani kulle dmıştawtıfi li şultonutho, udımdabri Suriya camıhdode”. 

Cali sbutho di tahrazto ducdo dkıtle u Huyodo d’Urifi laşan du dactid d’Suriya, kalas mırla “ahna ksaymina hboso cal Darımsuq laşan dımhalqo a’dawsat trise, ulo balhude dşımcina mamle. Kıtlan ste esore qawye camu kenşo mdinoyo d’Suriya dkımqdamlan taşrore dkıtne ğalabe b’dıqqa u ulsoye. Kmıtyaqnono dkıtlan kawtho nacımto d’fatho laşan dımtarsina i aykanoyutho b’gawıd d’Suriya. Klozım dsaymina u medano, cal dlayto bidothayna elternativ hreno”.