İ naşifutho bı britho kzeydo a turone kyıqdi mi şahinutho dkowe

İ şhantho dı britho mıqa dıkşofıc u zabno kzayto. U hano ktore dzaydo i naşifutho bı britho wa turone dyıqdi.

U yarho dı Tamuz dşafıcina şafıc lu makthabzabno u yarho dhawi u muzoğo şahino ebe ba 142 ışne haroye.

Lfuth u taşroro di daira du Okyanus Umthoyo udu Atmosfer NOAA, bu falqo du garbiyo di brithaydan bu yarho d’Tamuz i şhantho saliqo 1.53 darğe, bu şıkılano twir u rekor da 142 ışne haroye.

B’Asya u yarho d’Tamuz hawi u yarho hemo dkule hulu zabnano, b’Urifi i şhantho lo şafico da 2018 u hawyo da tre.

U mdabrono di daira du okyanus umthoyo udu atmosfer Rick Spindrad mbayanle idicoyo u yarho d’Tamuz kowe u yarho şahuno di şato u mırle “elo ocdo hawi rekor, u hano kmahwe u şuhlofo du muzoğo kmacbır britho b’aykanoyutho lo tawto u makiwonitho. ”

Bcayni zabno mawdıc b’taşroro hreno dı frıswo me şutoso d’Emwotho Mhaydotho cali sbutho du muzoğo, mzaharwo ida dlo mimıd, tedbire bu doro da 21 i şhantho dı britho gıdsılqo 2 darğe. Mamte lu boloste i şhantho wi naşifutho kuyo sabab lu yuqdono da turone. Ocdo bı dkotho mşahılfe dı britho kmitahwe ağuno mqabıl da yuqdone dkowe.