İ rişonitho zawgoyto Eren Keskin qayıthla 27 ışne hbuşyo

Ftih gawonoyith hol 124 dacwat u fsiq qariwo l’27 eşne hbuşyo li rişonitho zawgoyto d’İHD d’Turkiya sniğarto Eren Keskin

Bebzabno mawdıc, du mqımdino d’Ankara kımtayıb ruhe leşan dmitaqimo i hasinutho d’9 qoyume du gabo Demoqratoyo da Came-HDP.

İ rişonitho zawgoyto du şutoso da zedqe noşoye-İHD d’Turkiya, hkimo l’6 eşne 3 yarhe hbuşyo cal dcwıdla yamo bi sfaryawmo d’Özgur Gündem xıd awyutho. İ sfaryawmathe dsxirowa meqım eşne calu amro du rişqutno Turkoyo. Keskin bi egartho dfrısla bi dafayde du Twitter mırla; Foşo b’şlomo-hatu dıkmqadmitu a gzome. Gıdmawdıcanxu u mınyono da şkıwat uda hkome dqayıthli holucdo. Ono lo maşeli cnufyo, lo huwli husrono l’noşo ulo mhaqarli noşo-ono belhude kıtli renyo frişo mani dıkmdabri u athro.

Keskin mawdacla, dholucdo mqadım hol 124 şkıwat mqabıl dida wu mçazyo 26 eşne, 9 yarhe u 20 yawme hbuşyo. Camani’ste klozım dobo zıd me 400 alfo lirat Turkoye. U mathlano d’Keskin, kım’adıl calu qedomo qaşyo dkıtla i şultonutho d’Erdoğan la farsufe dkıtte renyo frişo u ğalabe folitiqore, gelyunore u hfite mahti ba hbuşye.

Bıthır ma cuqobe dsımla Turkiya calu garbyo du Cıraq, maşela’ste kampanya du msoko da htife uba kmo yawme haroyani msik ba mowat hadome d’HDP u farsufe hrene dıkmıthomi bi asirutho dcami PKK. Athmıl’ste mawdıc, du polis Turkoyo msıkle 11 farsufe b’Stanbul ma thome di asirutho dcamu gerilla.

Bebzabno u makthbo du mqımdino d’Ankara kımhaydır ruhe, dımqadım dacwa li wazirutho di kinutho leşan dmimodo i hasinutho d’9 qoyume d’HDP-dkıtte asirutho cami sbutho d‘Kobane d’Suriya; beynothaye a 2 rişone zawgoye d’HDP Garo Paylan, Meral Danış Beştaş, Hakkı Saruhan Oluç uğer. En dmimodi i hasinutho da qoyumani, baroyo gıdmitahti bıthır bu hbuşyo.