İ sictho da wazire du Mawtbo d’Urifi tlıble dmıtrın hire u rişono catiqo d’HDP Demirtaş wu hfito Osman Kavala

İ sictho da wazire du Mawtbo d’Urifi tlıble du rişono catiqo du Gabo Demoqratoyo da Came HDP Selahattin Demirtaş wu hfito Osman Kavala dkıtne yasire b’Turkiya dmıtrın hire.

U Mawtbo Urifoyo hule zabno Demirtaş hol 30 bu yarho d’İlul dmıtre hiro.

İ sictho da wazire u Mawtbo d’Urifi  dıksoyım u duyoqo cala fusqone dıkmaydlın u Bethdino da Zedqe Noşoye d’Urifi kmitanhıti la haye aw lo, mawdacla u fusqonayda bhaq Demirtaş u Kavala.

İ sictho du Mawtbo d’Urifi tlıble du rişono catiqo du Gabo d’HDP Selahattin Demirtaş dmıtre hiro wu fusqono du hbuşyo dkito bhaq dide dmitahru

İ sictho mawdacla, u fusqono du hbuşyo d’4 ışne u 8 yarhe dhiw bu hawo di propaganda l’Demirtaş, kıtle nişo dı tıryole bu hbuşyo b’nişo lo mıştawtıf ba guboye.

İ sictho da wazire hula zabno hol 30 bu yarho d’İlul l’Turkiya leşan dı tıryo hiro Demirtaş. İ sictho bu taro du fusqono di daira rabtho du bethdino da zedqe noşoye d’Urifi huwola zabno hol 22 bu yarho dı Hzirın l’Turkiya leşan dımqadmo tahrazto bi sbutho du terfito d’Demirtaş. Elo Turkiya lo mqadamla i tahraztathe.

Bcayni zabno u mawtbo d’Urifi mkarale u talabayde, d’Osman Kavala dkıtyo morıd dşuğlo dmıtre hiro u hule zano holu knuşyo dıgıdmisım bu yarho d’Konun u Haroyo.

U qoyumo d’Demirtaş Benan Molu bi maqırhonutho dı frısle calu darbo du tboco froso kenşoyo calu fusqono du mawtbo d’Urifi mırle “bi ytawtathe kıtwo ntırto Turkiya dmizahro u dmişarewo u maşıqlo da tedbire. Elo i sictho mıdla fusqono dnıtro holu yarho d’Konun u Haroyo.”

U knuşyo athoyo di sicthathe da wazire gıdhowe beyn 30 Teşrin u Haroyo u 2 Konun u Haroyo.