İ şultonutho d’Australia gıdorşo me hatho i klaytayda bi sbutho du qtolğenso dsımwo ban 1915

‘İ şultonutho d’Australia, gıdorşo me hatho i klaytayda bi sbutho du qtolğenso dsımwo ban 1915 calan Armınoye, Suryoye Othuroye u Pontusoye’ a melani di wazırto di baroyutho d’Australia Marise Payne’ne.

Bu mamlayda Payne mırla’ste; Bi sbuthathe du qtolğenso, kıdorşina’ste u qedomo wi klayto dkıtla Amerika uğer athrawotho hrene bu şwolano.

Bu zabno da buqore dsimi cami wazırto di baroyutho d’Australia mi Sictho da esore baroye, i Sicttho da esore di mşaynutho udi tagorutho bu Senato du athro, Marise Payne mfanela a şwole dımşayli mena. Cali şwolo dcalu qtolğenso dan 1915, Payne mfanela di şultonutho kıdorşo ucdo me hatho i klaytayda bi sbuthathe.

Bu yarho d’Nison da 2011, bu zabno dkıtwe u rişwazire Scott Morrison qoyumo, tlıbwole di şultonutho federaloyto dmawdıyo bu qtolğenso. Elo bu mamlo dsımwole bu duxrono da 106 eşne du qtolğenso dan Armınoye, lo mıstacmewole i meltho du qtolğenso ubi sbuthathe xlıqwo hfuxye mqabıl di şultonuthayde.

Bıthır kmo yawme, sımwole u rişono Amerikoyo Joe Biden mamlo u mawdewole da hawbe dsimiwo-qtolğenso’we. Camathe’ste i kongre d’Amerika heş ba 2019 mawdewola ebe. Calathe i senatore Penny Wong mşayewola cali hzayto di şultonutho d’Australia cali mawdyonuthathe d’Biden.

Wong, grışwola’ste u zuhoro cala kampanyat ucala maqırhonwotho dfrisi ba zabne haroyani me folitiqore, senatore u tukose frişe leşan i şultonutho dmawdıyo bu qtolğenso dan 1915. Calu şwolano Payne mfanela; Kıhozina u kışumcina a talabe kulle dsimi calu qtolğenso, wi sbutho gıdmimodo li ido me hatho.

Payne mırlaste; Kıhozina a fulhone dmaşelın a mathlone dan Armınoye, da Suryoye Othuroye u Pontusoye bi sbuthathe du qtolğenso ubi idactho’na du snodo dmahwe elaye me ğalabe hadome du parlamento, folitiqore ume tukose frişe dıktulbi mi şultonutho dmawdıyo bu qtolğensano dsim cala 3 came Mşihoye. Kıtlan iqoro la fulhonani dsimi hani eşne.