İ şultonutho d’İsroyel sımla qroyto l’Mişel Caun dıdırşi u qetro du thumo da maye

İ şultonutho d’İsroyel sımla qroyto lu rişqutno d’Lebnon Mişel Caun dloqın hdode b’athro Urifoyo, bnişo dıdırşi u qetro dkito baynothaye bi sbutho du thumo da maye.

 U waziro du haylo du energi d’İsroyel Yoval Ştanits, bi qroyto dsımle lu rişqutno Caun, grışle u zuhoro cal Lebnon dımşahlafle kımo naqlat i hzayto dkıtwole bi sbutho da thumayde cam İsroyel.

U waziro du haylo du energi d’İsroyel Yoval Ştanits, sımle adyawma qroyto lu rişqutno d’Lebnon Mişel Caun, dloqın hdode fotho bı fotho bıha ma nathrawotho d’Urifi, bnişo dmabdın bıqrihutho yaste bığnizutho bazare towe dkibın dmamtın şroyo aminoyo lu kriz da thume du yamo dkito bayn Lebnon u İsroyel.

U waziro İsarloyo Ştanits bi şişaltho da maqırhınwotho dıfrısle bi dafayde du Twiter, mawdacle dkıtyo fsihoyo bu diyalog dkowe bayne u bayn du rişqutno d’Lebnon cali sbutho da bazare da thume cam İsroyel, u mırle l’Caun “camıhbol dlıkıdcitu i şarirutho dkito bi sbuthathe, cal du gabo Lebnonoyo mşahlafle kımo naqlat ihzayto dkıtle cala thume du yamo ba 15 ışne dşaficina. Mu yarho d’Konun u Haroyo i şato da 2007 mu zabno dımbayniwo ruşmoyith athume du yamo bayn d’Lebnon u Qufrus u hul ucdo, i şultonutho d’Bayrut mbayanwola şawco xtute mşahılfe da thume du yamo cam İsroyel, baynothaye dmawdıciwo l’Emwotho Mhaydotho, baynothayeste la hayalwotho d’Yonifel u hın ma xtuteste mawdıciwo lu gayso d’İsroyel. Ocdo i taşdarto d’Lebnon mqadamla xtute hrene da thume ba bazare dkowın cam İsroyel bi qastra d’Alnaqura bu tayımno d’Lebnon, awkith axtutani ahathe latne cayni xtute dımbayniwola i şultonutho d’Lebnon ba 15 ışne dşaficina”.

Camgabıdathe, u waziro Ştanits mawdacle dıtlıble mi taşdarto İsarloyto dıkmıştawtıfo la bazare d’Alnaqura, dhuyo masırto camu xtuto du yamo dımbayanwo l’Ewmotho Mhaydotho meqım 10 ışne. U bebzabno, Ştanits tlıble mi taşdarto İsarloyto dhowın abazarayda bragmatikoye laşan dmışre u qetrano.