Pompeo mawdacle dkıbci mıthabti i şalyutho bu qlimo du madınho mescoyo

U waziro di baroyutho d’Amerika Mayk Pompeo, mawdacle di mdabronutho d’Waşington ba fulhone dıksaymolın, kıbco dımthabto i şalyutho bu qlimo du madınho mescoyo.

 Pompeo bi maqırhonutho dhule lu tboco froso, grışle u zuhoro cal athrawotho hrene Caraboye dgıdmıştawtıfi la qyome du şlomo cam İsroyel.

U waziro di baroyutho d’Amerika Mayk Pompeo bi maqıblonutho dsımle acme u grub da froshezwe d’Alcarabiya, makadle di mdabronutho d’Waşington kımdawmo afulhonayda laşan dımşarıro u şlomo, udımdafco ayuthrone wa bnayqyomayda bi fnitho du madınho mescoyo. Bebzabno, Pompeo maglele li holo dkitoste athrawotho hrene Caraboye dgıdmıştawtıfi la qyome du şlomo cam İsroyel, u mırle “kıtwolan sabro da Fleştoyeste dmıştawtıfiwo la qyome du şlomo cam İsroyel, elo i mdabronuthathe rfıdla u medano”.

Camgabıdathe, Pompeo grışle u zuhoro calu qento dkıtle u rejim du İran calu qlimo du madınho mescoyo, u makadleste da nathrawotho Caraboye fayış kıdci u qento mşawtıfo dkito aclaye mi xasra du İran, u ba melani mdawamle “i siyase d’Amerika thabıtoyo lafu İran. Amerika bu taro du strateji dkıtla bu madınho mescoyo, mşatasla koalisyon laşan dmonıc i şultonutho dı Tahran dımharhızo i şalyutho bu qlimo du madınho”.

Cali sbutho du kriz du Iraq, Pompeo mawdacle d’Waşington kfulho laşan dmitarkıwo i şalyutho bu athro du Iraq, u mırle “a’Iraqoye mahwelın mabco dlıkıbci dmitasri camu İran. Wu nişo di ithutho folhoyto d’Amerika bu Iraq dmitahwe snodo li şultonutho du rişwazire Mustafa Alkazimiyo”. U cali sbutho di marıhbonutho, Pompeo mawdacle du koalisyon dımşatasla Amerika qadır d’qoşıc Dacış bu Iraq u b’Suriya.

U waziro di baroyutho d’Amerika Mayk Pompeo, mabdewole i şabtho dşaficina socurwotho l’şawco athrawotho, asocurwothayde dımşarewolın me Fransa mdawamwolın bıthır l’Turkiya, l’İsroyel, la İmarat u li Scudiye.