İ şultonutho lo sımla buqore u buhone cali sbutho di eqartho d’Diril

Hın ma şutose noşoye dkito b‘Turkiya, sımlın sturyo u şıkıl du qedomo di şultonutho du athro li sbutho di iqartho dbe Diril, dkıtyo heş Hurmız Diril mvayco.

A şutose noşye kımmi; I şultonutho lo sımla buqore uloste buhone cali sbuthathe, dfayıt zıttır me şato acla.

I iqartho dbe Diril wa nacime di mnohto Şmuni u Hurmız Diril, kull naqla sımlın sturyo u qedomo da mşale du qlimo cal dlo sımlın i wolitho dıknuflo aclaye calu veyoco di emo u babathe u dlo karixi udlo ftıhlın buqoro bi sbuthathe.

Ucdoste 4 şutose da zedqe noşoye b’Turkiya frıslın maqırhonutho u krıhlın u qedomo du şutoso da zedqe noşoye b’Turkiya udi şawyutho TİHEK u kımmi; U şutosano lo sımle lo buhono ulo cuqobo cali sbuthathe wu belhude hula caqıl li iqartho.

An 4 şutose noşoye bi maqırhonuthathe kobın duktho la fulhone dsımlın a nacime di iqartho u kull naqla dtlıblın dmıkrıx u dmıftıh bethdino calu qatlo di mnohto Şmuni Diril, elo lo qayıthlın funoyo mu şutoso da zedqe noşoye d’Turkiya udi şawyutho TİHEK. Bi sbuthathe a nacime di iqartho kulle, ba tahrazyotho dsımlan acmaye ba mamlathe mawdacwolın dlıkhozın da mşale du qlimo ksaymi mede bi sbuthathe.

A şutose dfrıslın i maqırhonuthathe hanine: U hudro dıkmcaqıb a zedqe şawye, u hudro du insyatif da zedqe, u hudro da zedqe noşoye, wu hudro dıkmbayın a zedqe noşoye. A şutosani bi maqırhonutho dfrıslın, tlıblın da hadome d’TİHEK cal dlo sımle i wolithayde, klozım dmıstacfe mi wolithayde.