İ tahwitho kmahwiyo dımdhe qyomo hatho beyn d’Tarablos u d’Anqara

Fris lu tbocofroso tahwitho dıkmagılyo cal qyomo hatho dımde bayn di şultonutho dı Tarablos d’Alwifaq dkımrayşanla Fayez Alsarraj u Turkiya.

 Lfuth u qyomano, i şultonutho d’Anqara gıdsaymo u duyoqo dcalu mal dıkmişadır lu lmino d’Tarablos b’Libya, ubebzabno gdımdabro i nuqazto du gımrık.

 Bu darbo dıhdo şırke dkıtyo u morayda ha ma more da şuğlone dkıtyo qariwo mu rişono du rejim dı Turkiya Erdoğan, Turkiya mdela qyomo hatho cami şultonutho d’Alwifaq d’Libya dkımrayşanla Fayez Alsarraj.

Bi tahwitho dmagle acla bu tboco froso, kmitawdıc du qyomano mıdhe bayn du waziro du momuno di şultonutho d’Alwifaq Faraj Bumtari u morıd da şuğlone Turkoyo Muhammad Gökbaşa. U bebzabno, i şultonutho d’Alwifaq lfuth u qyomo kfısqo dmasılmo i mdabronutho di nuqazto du gımrık li şırke Turkoyto d’SCK dımbayno xıd mşalo qadmoyo du duyoqo dcalu mal kule dıkmişadır l’Tarablos bu darbo du yamo.

Uqyomano gdımdawım lıtmone ışne, u baroyo gıdmitawrıx tmone ışne hrene, ida ha ma tıre gabe lule xabro luhreno dkobıc dmaklele meqım mu tyomayde bzabno dışto yarhe. Camgabıdathe, u qyomano gıdmamte yuthrone momunoye rabe li şırke Turkoyto d’SCK, cal di şultonutho d’Alsarraj kobo fsoso li şırke dmahto ido cal 70% mu timo du mal dıkmişadır lu lmino dı Tarablos ba hammış ışne qamoye du qyomo, uba tloth ışne haroye i şırke Turkoyto gıdmahto ido cal 60% mu timo du mal.

Uqyomano kobeste fsoso li şırke dhowela qentrun b’Libya laşan dsaymo a fulhonayda. U qyomano dımde bayn morıd da şuğlone Turkoyo Gökbaşa wi şultonutho d’Alsarraj, xlıqle zmomo u ruğzo rabo bayn da mşale du gımrık d’Libya, cal dıkmamte husrono momunoyo lu athro, u kobe aftho l’Turkiya dkıbşo ha ma qentrune asasi di tagorutho b’Libya.