İAEA; u İran ksonıc uranium zıd mu ittifaq dkıtwo acme

İ Daira Emwothoyto du Energi u du Atom dkıtyo u qentrunayda b’Den Haag d’Hollanda mawdacla, du İran ksonıc kmoyutho rabtho d’uranium.

 Lfuth u notarozo gawonoyo di dairathe Rafael Grossi, u snocano du uranium du İran, ğalabe claytır mu qyomo dımdewo acmeyo.

Bi maqırhonutho dhuwle u notarozo gawonoyo di Daira Emwothoyto du Energi udu Aton-İAEA, Rafael Grossi mawdacle, du İran kımdawım dsonıc uranium dkıtyo u darğayde ğalabe cleytır mu mede dımtafaqwo meqım acme. Grossi makadle, di kmoyuthathe du uraniumste kmitazido kul yarho.

Bi maqıblonutho dsimo athmıl acme me sfaryawmo d’Austoria, Grossi mfanele a şwole dımqadmi cali sbutho du uranium du İran, u mıqa zabno kibe dgorış hol dqodır u athro d’sonacle zayne du nukleer. Bu funayde Grossi mırle; Kımcaqbina i kmoyutho du uranium/du plutonium dıklozım, leşan u snoco d’zayne nukleer.

U notarozo İAEA mırle; Ucdo bu maşıqlano, latle u İran i kmoyutho du uranium dıklozım leşan u sonoc d’zayne nukleer. Elo me gabo hrenoste, Tehran krufdo dkıtla tahrazto du snoco da zayne nukleer u kımawdıco, di tahraztayda leşan yuthrone noşoyeyo.

A istixbarat d’Amerika u d’İsroyel kımakdi dkıte ithbate qrihe, du rejim du İran kımnase dsonacle zayne nukleer u hanoste dyoşo di mşalutho Emwothoyto dkıtleyo. U malolo du İran b’İAEA mawdacwole meqım yarho, d’Tehran kımjarbo ucdo sentrifuge hathe dkibın dmalizi calu snoco du uranium.