Ibrahim Murad bi maqırhonutho dhule mahwele hfuxyo mqabıl di maqırhonutho d’Caun

U gabo du Huyodo Suryoyo Tibeloyo, mahwele hfuxyo qaşyo mqabıl di maqırhonutho du rişqutno d’Lebnon Mişel Caun, dtlıble ma hayle di mşaynutho du athro d’lobın fsoso la mtagılyone d’suxri a darbone.

U rişono d’USUP İbrahim Murad, bi maqırhonutho difrısle bi dafayde, mawdacle du fusqono d’Caun qtolcamoyo cal Lebnon hem xıd athro u hemste xıd camo.

A mtagılyone b’Lebnon, kımdawmi d’suxri a darbone ba mdinotho mşahılfotho du athro, xıd hfuxyo mqabıl di aykanoyutho casqo di ciyeşe momunoyto udu fasad, ucal di lira Lebnonoyto shifo mqabıl du timo du dolar. Adyawmaste ba şoce d’safrayto a mtagılyone sxırlın a darbone du cboro u nfoqo d’Beyrut, elo bıthır b’zabno, hın ma darbonani ftihi lu mazlo mathyo li mdito.

Cala şuşote haroye dkowın, u rişqutno d’Lebnon Mişel Caun qtırle athmıl knuşyo cami şultonuthayde, bi mıştawtfonutho da rişone da hayle di mşaynutho wu rişono du bank qentrunoyo d’Lebnon. Bu knuşyano Caun tlıble ma haylr folhoye, dmatimi u sxoro da darbone, u mawdacle du mede dıksaymi a mtagılyone fulhono mtakso du tehriwo’yo, wu nişayde dmımhoyo i şalyutho du athro.

Bu mamlo dsımle Caun mırle, A bnaymothoye kıtlın u zedqo dmahwın i hzaytaththe, elo u sxoro da darbone dyoşo’yo calu zedqo da bnaymothoye dkızzın u d’kothın la fulhonathe, dilonoyith bıthır mu fusqono du karanten dımdawamwole kmo şabe mqabıl du virus d’Corona. Usxoro da darbone lıkmitaqbıl, uklozım a hayle di mşaynutho dsaymi i wolithathe udmafiti a qonune la haye.

Calu medano, u rişono du gabo du Huyodo Suryoyo Tibeloyo-USUP İbrahim Murad, bi maqırhonutho dfrısle bi dafayde du nawlo, mawdacle du fusqono d’Caun qtolcamo’yo cal Lebnon-hem xıd athro u hemıste xıd camo. Murad mawdacle du sxoro da darbone hfuxyo kyonoy’ yo mu camo dmati l’aykanoyutho dkafno, u dlo fayışle sabro bi şultonuthathe du fasad dkıtyo kbışto me Hizballah u dkıbco dmafito la haye i tahrazto dkıtle u İran calu Madınho mescoyo.