İmğaltho d’Sabro kmamtiyo lu yowmoyo ahjome dıkmisım cala ağre mqadşe da mşihoye b’Turkiya

İ qoyumto d’HDP Tülay Hatimoğulları mqadamla rmoyto dı şwolo lu waziro di mardutho udu Turizm d’Turkiya Mehmet Nuri Ersoy bhaq da citotho dıkmitahti lu zbono.

 Bi rmoyto kmıtlıb dmitahıt tedbire u dmisım fulhone leşan dmınfıq moro la citotho u dayre u dmıkle qamuthı du zebono da citotho me farsufe dilonoye.

Bu tebo dfris bi mğaltho Suryoyto d’Sabro kmitawdıc bğalabe ma qlime d’Turkiya a mulkone da qalilotho kmitahıt ido aclayye;beynothayye i dayro d’Mor Garbiel ba alfayo citotho, dayre u bethqbure naqlat hiwi li wazirtho di tawditho, naqlatste mawfıqi lu zebono.

Calathe i qoyumto Tülay Hatimoğulları mcadronitho di rişutho zawgoyto du komisyon da came uda haymonwotho d’HDP mqadamla rmoyto d’şwolo dıkmawdıco eba; 14 bu yarhano cito Armınoyto dkıtyo b’Bursa mahto lu zebono bi dafo du nawlo sahibinden.com. Kımşaylo lu waziro di mardutho udu turizm Ersoy, mın tedbire msıklox cali cito Armınoyto d’Bursa uda citotho hrene dmahti lu zebono ba 5 eşne haroyani?

Bi rmoyto i qoyumto d’HDP kmawdıco a citotho dfayişi dlo camo trın lu qadar druhayye, hın simi stabıl, hın cambare u hınste hawın nişo lu tehriwo da farsufe dıkurxi cal xıznat. A citotho dşafici lu mulk dilonoyo u dıkmitahti lu zbono zayidi. Elo a citotho xıda sinagog wa masığde laybın dhowın mulkone dilonoye dmizabni, hani bınyonene dkıtne ftihe lu camo. Me gabo hreno a citotho dkıtne yurtutho  marduthoyto cal dkıtne timoyotho ulsoye laybın dmizabni

 Bi rmoyto kmitaqrıhste, bıthır ma 1915 cam dmahıt ido cala mulkone dlatne da Maşılmone, a şutose tawdithoye simi mulkone dilonoye u mawxa kmıhze da citotho dmitahti lu zebono. Hatimoğulları ktulbo dhowe qedomo bu taro di hirutho tawdithoyto udu wijdan, u dmihalıq dawsat leşan dmıkle b’qamuthe du zebono da citotho xıd mulkone dilonoye.

Camgabıdani hın ma şwole dıkmşaylo i qoyumto lu waziro hanine, i waziruthathxu kıtla wolitho dnufqo moro, dımşawşıto u dmacişo i yurtutho tawdithoytoyo elo mınyo i celtho du qdomathxu dlatyo calu asasano. Ba 5 eşnani kmo citotho mawfıqi lu zebono? U tapo dkmo citotho u dayre di waziruthathxune.