İmwatyutho beyn d’Urifi u d’Turkiya kımdawmo calu yamo mıscoyo

İ mwatyutho dımşarewola bayn Turkiya u Qufrus calu kroxo du nafto bu yamo mıscoyo hawyo mwatyutho bayn la athrawotho d’Urifi u d’Turkiya.

Bıthır mıd Turkiya mafıtla i sfitho du kroxo du nafto dkıtla lu darğo dımşaryo bu kroxo, u Yawnan sımle qroyto la athrawotho d’Urifi dhulın mehdo funoyo

Bi sbuthathe dhawyo qale ftıhto bayn Turkiya u la athrawotho d’Urifi kıtla cımqo rabo dkıtyo ma gıdhowele i noturutho du yawmo mıscoyo dkibe nafto Gasat u be bzabno dkıtyo u darbo dıkmasır ğalabe athrawotho bıhdode xıd Libya, Mısır, İsroyel, Lebnon wa athrawotho hrene dkıtne heş rahıqtır İtalya u ğer.

Bıthır mıd hın ma athrawotho camu Yawnan mşarewolın dsaymi kroxo calu nafto u ğer Turkiya mşarele dımhadıdo dhiya kıtla zedqo dsaymo kroxo u fayiti li harake cam Libya Laşan dhowelın duyoqo cala maye dkıtne bayn da athrawothani dkıtne ğalabe ulsoye.

Bıthır mu qyomo dsımla Turkiya cam falqo mi şıltonutho d’Libya maşrela i mwatyutho u be bzabno Turkiya mhadadla dkıbco kurxo calu nafto ba maye dkıtne qariwe l’Qufrus.

İ sbuthathe ucdo mamtela i aykanoyutho lı qrobo bayn Turkiya lu Yawnan wu snoda da athrawotho d’Urifi.

Athmıl bıthır mıd Turkiya mawdacla dı manhatla i sfitheyda du kroxo u mafitola lu darğo du kroxo u Yawnan qrele la athrawotho d’Urifi dmıthkanşi u mbayni klayto mqabıl du mede dıksaymo Turkiya, bıthır mi qraytathe u malolo du mawtbo da esore baroye d’Urifi Peter Stano mırle, Ahna i klayteydan qrıhtoyo gıdmıskina u gabo du Yawnan u d’Qufrus da Rum.

Me gabo hreno u athro d’Fransa manhatle u qyomo dkıtwole cam Qufrus bi sbutho di tagorutho du zayno la haye. U hawxa Fransa manhatla a tayısyotho du qrobo dkıtyo ışmaye Rafale li gozarto d’Qufrus.

Lfuth u tbcoco froso a tayısyothani manıhti ucdo l’Qufrus laşan saymi u duyoqo du yamo mıscoyo.

Adyoma mawdıc du waziro di baroyutho d’Amerika Mike Pompeo gıdloqe u waziro di baroyutho du Yawnan Nikos Dandias yawme dıcruto laşan dı dırşi i mwatyutho dkito cam Turkiya. Be bzabno  u mşalo da esore baroye du huyodo d’Urifi Josep Borelste mawdale dıglıtmi laşan maqırhi i klayto dkıtlın mqabıl d’Turkiya.

Cam hathe kula Turkiya mşarela dobo maqırhonwotho dkıbco şıryo u şuwolano camu Yawnan bu darbo da esore.