İsdirutho du kenşo Yezidoyo sımla qroyto la Yezidoye dı britho dımtaybi hfitwotho

İ sdirutho du kenşo Yezidoyo b’Urifi sımla qroyto la Yezidoye dıkhoyın ba nathrawotho mşahılfe dı britho, dımtaybi halxe u tagılyotho du protesto mqabıl du qyomo dımde bayn d’Boğdod u Arbil cali aykanoyutho d’Şigur.

Camgabıdathe, u mawtbo di mdabronutho yothoyto d’Şigur sımle qroyto la hayle u la gabe folitiqoye kulle da Yezidoye, dhowın hadire lu sutoro du kenşo Yezidoyo dkıtyo ucdo bu qento bi fnitho d’Şigur bu garbiyo du Iraq.

İ sdirutho du kenşo Yezidoyo b’Urifi, frısle buyono dımde 09 bu yarho dı Teşrin u Qadmoyo dşaficina bayn di şultonutho du Iraq u gabo demoqratoyo d’Kurdistan di KDP cali aykanoyutho wi ctidutho d’Şigur. İ sdirutho bu buyonayda mawdacla du qyomano dımde fusqonoyo dmisım qtolcamo jıddi calu kenşo Yezidoyo d’Şigur.

İ sdirutho mawdaclaste di şultonutho du Iraq lfuth uqyomano, mşarela dmaltımo hul 10 alfo folhe laşan dımtawqi Şigur, u calalthe isdirutho sımla qroyto lu camo Yezidoyo dıkhoye ba nathrawotho mşahılfe dı britho, dımtayıb takılyotho qum da mathlınwotho du Iraq u du qlimo d’Kurdistan dkıtne ba nathrawothathe, u takılyotho hrene qum da mathlınwotho d’Emwotho Mhaydotho, bnişo dmitahwe hfuxyo mqabıl di tahrazto du kboşo d’Şigur u du qento dkımhadıd u dactid da Yezidoye bu garbiyo du Iraq.

Yawme d’cruto dıbqamuthayna, gıdmitayıb takılyotho du protesto ba mdinotho mşahılfe d’Almanya u d’Urifi, bnişo dmınfıq moro li sbutho da Yezidoye d’Şigur.

Camatheste i Mdabronutho Yothoyto Demoqratoyto d’Şigor frısla maqırhonutho u mahkela cali aykanoyutho harayto d’Şigor wu plan dkıtle u Iraq cali fnitho u tlıble ma gabe u ma hayle folitiqoye kulle dhowın hadire dımhafdi cala Ezidoye d’Şigor mqabıl da qente. İ Mdabronutho mırla; Mu zabno du qyomo dhawi cal Şigor beyn du rişwazire du Iraq u di şultonutho d’KDP u bu duyoqo d’Emwotho Mhaydotho me 9 bu yarho d’Teşrin u qamoyo dı şafıcina u holucdo, u camaydan qayım li rağlo u kımtayıb ruhe dobe ağuno.

İ Mdabronutho mırlaste; U camaydan huwle delqublo b’şıkılat mşahlıfe wu ucdoste kımhaydır ruhe lıhfitwotho demoqratiqoye leşan dmahwe ilo thınihuthayde lu qyomano. İ şultonuthaydanste mu yawmo qamoyo u holucdo kımtaybo ytawyotho cami şultonutho, farsufe, hayle folhoye u gabe folitiqoye leşan dmışre u qetrano bu darbo du dialog. Elo camıhbol, kmahwe dkubci dmafiti u qyomano la haye cal Şigor.

Bebzabno, bi maqırhonuthathe mawdıc du qyomano, kıdoyış u sebyono u neshono du camo Ezidoyo u dmışrın a hayle d’YBŞ dhuwlın ağuno mqabıl d’Dacış, dmitahıt ido cala zaynathe, dmisım u duyoqo da darbone dıkmasri a qıryawotho wa mdinothathe, dmısxori a darbone dkızzın la dukotho tawdithoye u dmitacbır hayle nuxroye li fnitho. Bu şıkılano a Caraboye dısnıdwolın Dacış, dhıftolın u mzabanwolın u qtiwolın a Ezidoye b’Şigor, gıducri la dukothaydan u bi netije gıdowe qtolğenso hreno aclayna. Calathe kıtulbina ma gabe u ma hayle folitiqoye kulle dımhafdi cal Şigor u cala comurayda a Ezidoye.