İsroyel mzaharla Başar El Asad

U rişwazire du athro d’İsroyel Benyamen Netenyahu mzaharle u rejim du athro d’Suriya bi sbutho da hayle du İran dkıtla b’Suriya.

 Me gabo hreno lfuth i sfaryamo Turkoyto u rişathro d’Suriya Başar El Asad azoloyo u mcayır athro ele dıhoye ebe bıthır mi nfalteyde.

U rişwazire Benyamen Natanyahu bu zabno dkıtwe camu qoyumo d’Amerika Brayan Hook hule maqırhonutho la gılyunore dkıtweyne hadire u mırle: en Başşar El Asad dobe fsoso lu athro du İran dmawzıd a folheyde awste dhowele ithutho bu athro d’Suriya klozım dodıc u rişmeyde u dachtid dide latyo tawo.

Natanyahu mırle lı kobina fsoso dmıftıh gbino hreno di marhbonutho mqabıl d’İsroyel bu athro d’Suriya. Mawxa i ithutho du İran b’Suriya qentoyo mawxa u rejim d’Suriya dkıtyo bi rişonutho d’Başar El Asad klozım dodıc inaqa u İran dımdawım dmaqwe i ithutheyde b’Suriya inaqayo kibe dhuyo i harayto du Rejim d’Başar El Asad.

Bi sbuthathe idicoyo d’İsroyel hani zabno yarixo kmohe ba tayısyotho ba nuqazyotho dkıtle u İran b’Suriya u qtili mınyono dhayle du İran.

Me gabo hreno hıdo ma Sfaryawme d’Turkiya Yeni Akit mawdacla du rişono du athro d’Suriya Başar El Asad azoloyo mi rişonutho bzabno karyo.

Lfuth u tebano dıfris kmitawmır bıthır mi casqutho momunoyto dhawi bu athro u rişono Başar El Asad gıdtore mi rişonutho u gdımgalwe lıha ma athrawotho du madınho mıscoyo dımhaydır ele.

Adyoma kito u knuşyo d’Astana dımşarele gıdmahwe bıthır mın fusqone mıdlın Rusya, Turkiya wu İran.