24/06/2021

Joe Biden grışle u zuhoro d’Erdoğan u d’Putin dlosaymi hçome cala dukotho dkıtne bi morutho d’QASAD

Dafo Amerikoyto sımla maqıblonutho camu mathlono du gabo Demoqratoyo da Came-HDP b’Woşington Giran Özçan.

Bu mamlayde Özçan maglele, du rişono Amerikoyo Joe Biden grışle u zuhoro du rişqutno Turkoyo udu rişono Rusoyo, dlo saymi hçome cala dukotho dkıtne bi morutho da Haylawotho d’Suriya Demoqratoyto.

Giran Özçan dkıtyo u mathlono di HDP b’Woşington d’Amerika, m’akale lhdo ma dafe du nawlo di arişkoyto, dmatilın mawdconutho mu Qusro Heworo du rişono Joe Biden, tlıble ma bnay’amnayde d’Turkiya u d’Rusya dlo saymi hçome cala dukotho da Haylawotho d’Suriya Demoqratoyto.

Özçan mawdacle, d’Biden grışle u zuhoro d’Vlademir Putin u d’Recep Tayyıb Erdoğan u m’akadlelın, di mdabronuthayde kımfaşqo u teqşiyo da hçome ba dukotho d’QASAD, xıd xtuto semoqo. U mathlono du Qusro Heworo mawdacle l’Özçan, d’Biden kobe ulsoyutho lu şwolo da came du garbyo udu madınho d’Suriya ula hayle d’QASAD.

U mathlono du Qusro Heworo mawdacle, d’Amerika kobo yuqro li mşaynutho uli şalyutho du garbyo udu madınho d’Suriya u gıdmdawmo a fulhonayda leşan u terkiwo du maşıqlo folitiqoyo ulu qşoco da ğrobe marhıbone d’Dacış bu qlimo. Elo i sbutho da hçome d’Turkiya cali PKK, Özçan mawdacle di şultonutho d’Biden lıkobola ğalabe ulsoyutho.

U inisyativ d’Erdoğan’we l’ytawto cam Biden meqım şabtho wu rişqutno Turkoyo labıc dğer mşale Turkoye dhudri ba droşani dcamu rişono Amerikoyo. Bu mamlayde li dafo Amerikoyto, Özçan mahkele’ste cala esore dkıtla i şultonutho d’AKP cama ğrobe di mafia uda esorani, kobın husrono lu terkiwo du şlomo uli mşaynutho b’Turkiya-dilonoyith bi sbutho da Kurdoye.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…