Josef Sliwa maglele cal hın mın dyoşe dsimi bhaq du zedqo dkıtle u camaydan di daşto d’Ninwe

U mraşho di lohitho du gabo du Huyodo d’Bethnahrin Athroyo du Iraq Josef Sliwa, maglele cal hın mın dyoşe dsimi bhaq du zedqo dkıtle u camaydan di daşto d’Ninwe dobe qole ba guboye gawonoye du Iraq.

Sliwa bi maqırhonutho dıfrısle, mawdacle di Peşmarga du gabo di KDP d’Mascud Barazani mcınlın a’comure dhın ma qıryawotho du camaydan, d’obın qolaye lu mraşho dhınne dımnaqelın mbayn da mraşhe du camaydan la guboye du parlamento du Iraq.

U mraşho di lohitho du gabo du Huyodo d’Bethnahrin Athroyo du Iraq Josef Sliwa, bi maqırhonutho dıfrısle bi dafayde du facebook, maglele cala dyoşe dsimi bhaq dhın qıryawotho du camaydan dlew elaye fsoso d’obın qolaye ba guboye gawonoye du Iraq.

Sliwa dkıtwe qoyumo catiqo bu parlamento d’Boğdod, mahkele calu mede dhawi la comure dhın qıryawotho du camaydan dkıtne masre cami dayro d’Mor Matta di daşto d’Ninwe, dluwo elaye fsoso d’obın qolaye lu mraşho du kontenjan du camaydan, elo jbiriwo d’obın qolaye l’mraşho hrene du gabo Demoqratoyo d’Kurdistan di KDP dkımrayşanle Mascud Barzani.

Sliwa mırle “yawme d’Huşabo dşaficina bi şuctho di hdo u falge d’falgıdyawmo, mşadarwolan base laşan dımcadrinawo a’comure dhın ma qıryawotho di dayro d’Mor Matta dmıştawtıfi la guboye. Elo a’comure da qıryawotho (d’Al Alfaf, Merge u Mağara) meqım mıdmotın li qastra d’Alşexan li duktho dkiba a’qentrunaththe da guboye, luwo elaye fsoso d’obın qolaye ma grube mzayne dkıtwo tamo udmırwolın la mgabyone du camaydan: ahna masrena camu mraşho Şerwan Doberdani. Lıkobina fsoso l’noşo dcobır li fnitho cal dkıtyo fnitho d’caşırto u harke balhude lu mraşho Doberdani kmitahwe u qolo. Doberdani u mraşho du gabo Demoqratoyo d’Kurdistan yo, wi fnitho kmisım u duyoqayda ma haylawotho di Peşmarga dkıtne masre cami KDP”.

U mraşho di lohitho d’HBA du mnoyo da 141 Josef Sliwa bi harayto di maqırhonuthayde, mawdacle du mede dsim mqabıl di demoqratoyuthoyo.