Sim u futoho di nuqazto du hulmono d’Habib Almaleh

Bi fnitho d’Caynkawa bu garbiyo du Iraq, sim u futoho di nuqazto du hulmono d’Habib Almaleh, bi mıştawtfonutho dhın ma mşale da şutose di hiğmonutho d’Arbil.

Habib Almaleh dkıtwe osyo mu camaydan, sımwo icdam mu rejim catiqo du Iraq bu zabno d’Saddam Husayn, cal dkıtwo masro camu gabo da Kominist.

Bıthır mıdkamili a’fulhone du hethothayda dımşarewolın bu yarho d’Odır dşaficina, sim 9 bu yarhano u futoho di nuqazto du hulmono d’osyo Habib Almaleh bi fnitho d’Caynkawa bu garbiyo du Iraq. Lu zawho du futoho, mıştawtafle u hiğmuno d’Arbil, u qaymaqam di qastra d’Arbil, u mdabrono di fnitho d’Caynkawa, u mdabrono di karxutho d’Caynkawa u ğer mşale d’şutose u hadome da şutose du hulmono d’Caynkawa.

Bu zawho du futoho, sim mamle mşahılfe calu maşılqo du bnoyo u hethotho di nuqaztathe dkımqadmo mşablonutho du hulmono lu camaydan d’Caynkawa. Laşan a’masrafe du hethotho di nuqazto, i sictho mdabronitho du hudro da yaqrotho da malfone d’Caynkawa mqadamla 100 malyune dinore Iraqoye, wa masrafe hrene hiwi mi mdabronutho du hulmono d’Arbil.

Habib Almaleh dkıtwe osyo mu camaydan, hadomo we bu gabo da Komonist du Iraq, mawxa ste msıkwo  mu rejim du Bacıth bi şato da na’1981, ubıthır mıdşafıcwo şato calu hbuşyayde sımwo icdam du şnoqo. Ubıthır mu qawmo camonoyo dhawiwo bi şato da na’1991 bıthır mu qrobo trayono du xaliç, u qentrun  du hulmono d’Caynkawa mşamahwo b’ışme xıd iqoro lu ağuno dmahwewole mqabıl du rejim dektator du Bacıth.

Habib Almaleh dkıtwe farsufo rhimo mu camaydan d’Camaydan, gawirowe u kıtle tlotho abne dıkhoyın cami yemaththe bu athro du Swed.