Josef Sliwa mahwele hfuxyo mqabıl da hjome dhawın calu bethtawso d’Erbil

U qoyumo du cameydan dmeqım bu parlamento du Iraq Josef Sliwa huwle maqırhonutho dıkrıhle ahjome soruhoye dsimi calu bethtawso d’Erbil du Iraq.

 Sliwa bi maqırhonutheyde mırle; Ahjomani, marhbonoye kıtwolen nişo dxolıq jğuşyo bi daşto d’Ninwe.

 U qoyumo catiqo du camaydan bu parlamento du Iraq Josef Sliwa, bi maqırhonutho dıfrısle kımşaryo ba melani: Ba soruhe dmafiri meqım kımo yawme b’Bethnahrin i madınhoyto bu Iraq, latyo star me cbodo marhıbono, wu medano qatciyan laybe dmitaqbıl.

Sliwa mırle; Ahjomani da soruh mafiri mi daşto d’Ninwe dkıtyo bi sagiyutho da comurayda mu camo Kaldoyo-Suryoyo-Othuroyo wu nişayde, dı xolıq jğuşyo u tahrikyo, leşan dlowe nihutho naqla hreto bi fnitho. Wu medano athi lu hwoyo bıthır mu dcoro da yaqrotho du cameydan, dımşarelın dmarıkwi ahayathe bi daşto d’Ninwe. U sucronano kıtle dnişo dı xolıq lo thınihutho b’Bethnahrin du Iraq.

U hathe kmifaşqo dişutho cala hiyoywotho kule di fnitho u gawonoyith du camo Iraqoyo, dkıtlın tuxlono bi şultonutho ruşmoyto du athro u latlın tuxlono bı şultonutho hreto. Ahna kımtalbina du zayno dhowe bu duyoqo di şultonutho u dmitaqwın a qonune. Dmıgroşi a grube kule dıktucni zayne lo qonunoye yaste dlatne bu duyoqo di şultonutho.

Josef Sliwa mırleste; kımhaymnina dhowe klayto qrıhto me NPU, dkıtne falqo da hayle Şica d’Haşdi Alşacbi du fırco da 30 dkıtyo falqo marhıbono. Kıtlan haymonutho da Iraqoye kulle, dımşajci li nihutho u hlimutho bi daşto d’Ninwe u dılo foyış hawxa hjome marhıbone.