Josef Sliwa mawdacle da guboye dıbqamuthayna gdımbayni i xarita folitiqoyto hathto du Iraq

U mraşho d lohitho du gabo du Huyodo d’Bethnahrin Athroyo du Iraq Josef Sliwa, sımle qroyto lu camaydan u Kaldoyo Suryoyo Othuroyo dmıştawtıf b’sagiyutho la guboye gawonoye dıkmıntır dmisomi 10 bu yarhano, bnişo dhowele duktho bu maşıqlo folitiqoyo hatho du Iraq.

U mraşho d’HBA du mnoyo da 141 Josef Sliwa, bi tahrazto dsımle acme u froshezwo d’Suroyo TV, mawdacleste da guboye dıbqamuthayna gdımbayni i xarita folitiqoyto hathto du Iraq.

U froshezwo d’Suroyo TV athmıl blalyo bıhdo tahrazto dilonoyto, sımle baytoyutho lu mraşho d lohitho du gabo du Huyodo d’Bethnahrin Athroyo du Iraq Josef Sliwa dkıtwe meqım qoyumo bu parlamento d’Boğdod. U mraşho d’HBA du mnoyo da 141 Josef Sliwa, bu şuroyo di maqıblonutho mahkele calu nişo di tahraztayde da guboye dıkmişaklo m’tlotho fosuqe umthoyo, athronoyo u noşoyo, u mawdacle dothe d’qomır ba guboye, gıdfolıh laşan dmisım u garanti dmitahwele u camaydan a’zedqayde lfuth u nomuso esonoyo du Iraq, u gıdsoyım ste u mede dıknofıl acle, bnişo dmişahılfo i daşto d’Ninwe l’hiğmonutho udmitakle u şuhlofo demoğrafoyo dıkmisım ba fenyotho du camaydan. Bebzabno, Sliwa mawdacle dgıdfolıh laşan dmitahwe yasfutho zıd lu leşono Suryoyo udmişatıs qentrune da buhone u botaysawbo dilonoye dcalu leşono emhoyo du camaydan.

Camgabıdathe, u mraşho d’HBA du mnoyo da 141 mawdacle d’mede towoyo dhowe menyono celoyo dımraşhe u lohiyotho mşahılfe du camaydan dıkmıştawtıfi la guboye, elo camıhbol mathkarle ste da mraşhe kulle latne b’awyutho cala sebwotho rişoye dkıbcayni u dactid du camaydan du Iraq, cal di sagiyutho da mraşhani kımşabli a’yuthrone wi aginda da hayle dkıtne masre acmaye.

U mraşho Sliwa ba funoyayde bi tahrazto, grışle ste u zuhoro calu hboso dıkmisım calu camaydan di daşto d’Ninwe u gawonoyith dıkhoye bu qlimo d’Kurdistan du Iraq, u camgabıd da grube d’Alhaşd Alşacbi thımle ste i Peşmarga Kurdoyto bu tehdid du camaydan ubu tezicayde, bnişo dmıçbır d’obe qole lhın mraşhe dkıtne masre cama gabe Kurdoye rabe dkıtlın haylo bi fnitho. Callathe, Sliwa mawdacle dhuwe farsufoyith mqadamle şkuwat li taşdarto d’Emwotho Mhaydotho dkıtyo bu Iraq Unami, bhaq da dyoşe dıkmisomi ma gabe Kurdoye calu camaydan dıkhoye bu garbiyo du Iraq, udkımnasın dımdawım u camaydan dfoyış dlo sebyono hiro.

Mxasra hreto, Sliwa mawdacle dıkmıtyaqın di netiçe da guboye dıbqamuthayna gıdhuyo tawtır ma guboye dmeqım, uhul darğo gıdobın funoyo la talabe da mtagılyone du protesto dımşarewolın bu Iraq bu yarho dı Tışrın u Qadmoyo bi şato da 2019. Bebzabno, Sliwa mawdacle ste dıkmıtyaqın da guboye dıbqamuthayna gıdmaciqi u dawro cjiqo dıkmıştacele u İran bu bnoyo du dactid hatho du Iraq, u maglele ste cali zuctho dkıtle ma gabe Iraqoye rabe dkıbşi naqla hreto u sahmo u kontenjan dkıtle u camaydan bu parlamento d’Boğdod.

Bu huthomo di maqıblonutho dsimo acme, u mraşho d’HBA Josef Sliwa sımle qroyto lu camaydan u Kaldoyo Suryoyo Othuroyo dmıştawtıf la guboye gawonoye dgımşarın 10 bu yarhano, bnişo dhowe falqo mi xarita folitqoyto hathto du dactid du Iraq.