27/02/2020

Jusef Sliwa hule maqırhonutho cali awyutho da gabe şutose du cameydan

U makıthbo du tboco froso du qoyumo catiqo bu parlamento du Iraq Jusef Sliwa, frısle maqırhonutho calu knuşyo dhawile cam menyono ma gabe u tukose folitiqoye du camaydan.

 U knuşyano sim bnişo dmıdroşo tahrazto du snodo da tagılyotho du protesto du Iraq dkımtalbi dhowe barmothoyutho kamılto b’gawıd du athro.

Hın ma sicotho da tagılyotho camoye du Iraq mnaqewolın u qoyumo catiqo bu parlamento du Iraq Jusef Sliwa, laşan dımathıl u camaydan u Kaldoyo-Suryoyo-Othuroyo ba protestowiye dıkmtalbi dmişahılfo i aykanoyutho folitiqoyto du Iraq.

Calathe, u qoyumo Sliwa sımle qroyto la gabe u tukose du camaydan dıdırşi camıhdode i sbuthathe b’knuşyo. Hatheste cal du qoyumo Sliwa kıtle haymonutho bu fulhono mkanşo, ucal dlıkobıc i sbutho du camaydan dmibayno m’ha farsufo awste mha gabo.

25 bu yarhano Sliwa mşadarwole qroyto ruşmoyto l’şawco gabe u tukose du camaydan dkıtne: u gabo da n’Abnaa Alnahrayn, u gabo d’Bethnahrin demoqratoyo, u gabo du mawtbo umthoyo Kaldoyo, u gabo du kunoşo da Suryoye, u gabo du Huyodo d’Bethnahrin Athroyo d’HBA, i mtakasto d’Kaldo Othur du gabo da Komonist d’Kurdistan wu gabo d’Alwarkaa.

U makıthıbo du tboco froso du qoyumo Sliwa, bi maqırhonutho dıfrısle mawdacle du knuşyano balhude hadırle u gabo d’HBA, i mtakasto d’Kaldo Othur wu gabo d’Alwarkaa demoqratoyo.

Bu knuşyano drişo i tahrazto du snodo da tagılyotho camonoye du protesto dkımtalbi dhowe barmothoyutho kamılto udmişahılfo i aykanoyutho mahişonitho du kenşo Iraqoyo. Ube bzabno bu knuşyano driş aydarbo kibe dhowe u camaydan u Kaldoyo-Suryoyo-Othuroyo falqo ma tagılyothani udmıştawtıf lu zawco camonoyo du protesto bu Iraq.