Qtil 2 cleyme mu cameydan bu athro du Iraq

Claymo Suryoyo mu camaydan bu buğro dmarıs acle m’zayno du saydo, qtil bu zabno dıkmıştawtafwo la tagılyotho du protesto bi mditho d’Boğdod.

 Camgabıdathe, claymo hreno mu camaydan qtil bu furqoco dhawi bıhdo foquctho qum di bethsawbo dilonoyto d’Alşam bi mditho dı Darımsuq.

 U claymo Suryoyo Rimon Rayyan Salım qtil bu buğro dımhe ebe bu zayno du saydo, bu zabno dmıştawtafle la tagılyotho dımtaybiwo bu wahdo d’Altahrir bi erişkoyto du Iraq Boğdod. U fağro du claymo Rimon mcafe athmıl b’zawho dımtayıb bi cito d’Sayıdıt Alnajat da Suryoye Qatholiqoye dkıtyo bi şawtho d’Alkarrada bı Boğdod, bi mıştawtfonutho d’kohne u menyono celoyo mu camaydan.

U claymo Rimon Salım dcımre 15 eşne, htıfwo meqım kımo yawme ma grube mzayne dıkmısnodi mu İran, u yawme d’Tre dşaficina awkith meqım mu qatlayde b’yawmo marfewo. İ iqartho du claymo Suryoyo cayşowa meqım bi mdito d’Nuhadra bu qlimo d’Kurdistan, u meqım hedor d’şato nqiwola l’Boğdod.

Camgabıdathe, u claymo Suryoyo Roy Micmari dkıtwe yolufo bi bethsawbo d’Alşam, qtil bu furqoco dı foquctho dmahtowa b’radayto qum du qentrun di bethsawbo dkıtyo bi fnitho d’Albaramke b’Darımsuq. Calathe, i bethsawbo d’Alşam bu buyono dfrısla bu facebook, mahwela u haşayda lu gedşano, u mqadamla a buyoyayda li iqartho du claymo Roy dkıtwe yolufo bethsawboyo dıkhoragwo bu ferco di ardixlutho du komputer.

U claymo Roy dkıtyo man abne di cito Suryoyto Malkoyto u abro d’Marwan Micmari’yo, ukıtle tre ahnone u hotho. Roy mawladwo bi qritho d’Barşin bi hiğmonutho d’Hama, wi emayde Hanna Başşur hiyaste qtilowa bı foquctho dımhalqowa cali fnitho d’Kaşkul b’Darımsuq bu yarho d’Odor da 2018.