Kaldo Oğanna hule turgomo bi bethsawbo d’Harvard, bu calway “u nfoqo du moro li mardutho Suryoyto Kaldoyto Othuroyto wu teqwiyayda bu Ciraqa doronoyo”

BOSTON, Amerika – U turgomano mtayıb cali zminutho dımqadmo mu ferco da leşone uda mdinoywotho du madınho tahtoyo di bethsawbo d’Harvard d’Amerika, xıd dawse dıkımgaşmo i yasifutho tibeloyto dıkmitahwiyo li yortutho marduthoyto du camaydan bu Ciraq. 

Bu turgomano dhew mu mdabrono gawonoyo di mardutho udi amnorutho Suryoyto bu qlimo d’Kurdistan du Ciraq Kaldo Oğanna, mahke bırwihutho cala qetre u casqıwotho dkito b’qamuthıd di mardutho du camo Suryoyo Kaldoyo Othuroyo dıkdıcri a’şerşayda lu athro d’bethnahrin u catiqo. Oğanna mahkele ste cala casqıwotho rabe u qaşye dcayışlın u camaydan bu makthabzabno hatho, mi celtho da qrobe, di golutho udu dyoşo marduthoyo dhawi bu taro da şuhlofe kenşoye u folitiqoye d’athın luhwoyo bu Ciraq. 

Bebzabno, Oğanna mşalatle bahro cala fulhone dıkmisomi laşan du sutoro di yortutho catırto du camaydan, u hathe ste bu darbo da cadcide marduthoye dıkmisomi, ubu snodo da buhone Suryoye, ubu tuyobo da hfitwotho marduthoye, u acmaye ste tahrazyotho hrene dilonoye dıkmisomi bnişo dmitaqwe u leşono Suryoyo. 

Camgabıdathe, Oğanna makadle i ulsoyutho dhowe methcadronutho bayn da şutose akadimikoye emwothoye wa şutose marduthoye du Ciraq udu qlimo d’Kurdistan, bnişo dmişawşıti a’fulhonani a’marduthoye udmisım u garanti du dewamaththe bu Ciraq. Oğanna sımle ste qroyto dmitazidi a’fulhone du snodo da tarmiyotho dkımcadri bu sutoro di yortutho noşoyto u makthabzabnoyto du camaydan mu qşoco. 

Lu turgomano mıştawtafle menyono d’mbahnone u akadimikoye Amerikoye u hfite bu haqlo di mardutho uda leşone catiqe.