Kalın bu mamleyde naqahreto mırle masayıl cala mşihoye dlatne şrolo

U malolo du rişqutno d’Turkiya İbrahim Kalın bu mamlo dsımle, naqla hreto frısle tebe dlatne şrolo bhaq da mulkone udi hirutho da tawdiyotho hrene dkıtne bu athro.

 Kalın bu funoyo dkobe lu Papa bi sbutho d’Ayasofya komır; A mulkone da qalilotho dıkbişiwo, madıcri elaye, u bi sbutho da tawdiyotho kito hirutho.

Bi sbuthathe u malolo du rişqutno d’Erdoğan, İbrahim Kalın cal hayna mulkone kmahke latyo idico, elo a mulkone di dayro d’Mor Gabriel dmahıtle u camo Suryoyo tacbo rabo aclaye dmitadıcri heş lo madıcrila Turkiya. Bıthır mathe a mulkone da qıryawotho du cameydan dhın mahıt ido aclaye, hın dkıtne ba bethdine cıl mıd mahıt haqa zuze aclaye heş lo madcıri.

Elo dakbar Kalın cal ğer mulkone kmahke, bram mede ha idicoyo bi sbutho da mulkone da Suryoye, a mamlani latne trise u latne şroro. Bi sbutho di hirutho tawdithoste mın şıkıl hirutho kito b’Turkiya, bu darğo qamoyo i wazirutho di tawditho belhude wazirutho di Maşılmonutho’yo, metul da mcadronwotho dkito belhude la fulhone di Maşılmonutho kmifarqi.

Da tıre ayna cito u ayna kohne Mşihoye kmitahwelın zedqo dhowın ahido di şultonutho, yaste kımahwe Kalın lıkhoze a tebe dıkmıfrosi bhaq da rişone di cito Protestanoyto dıkmitawfıqi mu athro u lıkmitahwelın fsoso dfayşi bu athro.

Zıttır mathe, a waqfat da citotho dkito latlın zedqo dsaymi ğuboye aw dımşahılfi mede haykoyo i hirutho di tawditho? dakbar cali hirutho di tawditho Maşılmonoyto kımahke, e hathe celaytır me kull medeyo b’Turkiya. Mathlo lu mamlano d’Kalın dlatyo şroro, kımo cem ewi da Calawiye kito bu athro.