Qoyumo Çelik bi maqırhonutheyde mawdacle dmaklele i hadomutheyde bu gabo di HDP

U qoyumo Suryoyo bu parlemento d’Turkiya Tuma Çelik bihdo egartho dıfrısle mawdacle, dımaklele i hadomutheyde bu gabo Demoqratoyo da Came-HDP.

 Bi egarthathe Çelik komır; Leşan u maşıqlo dmabdele u bethdino d’Turkiya bhaq didi dlobe husrono lu gabaydi, gıdmakleno i hadomuthaydi, elo gıdfaşno xıd qoyumo şaryo bu parlemento du athro.

 Bi egartho dıfrısle u qoyumo du camaydan bu parlamento d’Turkiya Tuma Çelik  hawxa mırle: 24 Hziron da 2018 mnaqeno bi hiyoyuthaydi i Suryoyto, qoyumo du gabo Demoqratoyo da Came-HDP li fnitho d’Mırde. Bu zabno dımnaqeno xıd qoyumo, kıthuwli rmoyotho mşahılfotho u mıştawtafli la fulhone du parlamento. Bıgawe du zabnano zabnotho  sagiyotho mamteli a sebwotho makthabzabnoye wi lo kinutho dkito mqabıl du camo Suryoyo lu droşo bu parlamento d’Turkiya.

U qoyumo bi egartheyde komır; Ba fulhonani dsimli bu parlamento, kodacno dıfsihi ğalabe noşo u bebzabno ğerste maqharlın. Mawxa sim hjome, mir dugle u fıtnat u tahdide mşahılfe mqabıl didi. Bu zabnano hıdo athto b’dugle mahıtla hawbe bıqdoli. I athtathe nqila a duglani lu gabeydi ulı dukotho frişe. U gabeydi leşan dımcaqıb i sbuthathe, naqlat mşahılfe hawilın ytawyotho acmi u cami athtathe.

Çelik mırle; Bıthır mıd fayıt şato cali sbuthathe, i athtathe b’senaryowiye mşahılfe nqila i sbuthathe lu mqimdayono ucali arcutho da duglani, u mqimdayono mhadarle şıkwe u bzabno karyo mawsıqole lu komisyon dkıtyo cayıd da şıkwatani. Bu şıkılano 22 bu yarhano d’Tamuz, gıdmimodi li ido. Cıl mıd kito ba mowat dı şıkwat bu komisyonano, b’siyasat mşahılfe mido lu yawmoyo. Hathe kula lıkmşahılfo da mamlani kule duglene.

Bıthır mathe kula dhawyo, frıqli di sbuthathe gıdhuwyo teştcınyo di siyase mawxa abıcno dmanharno u yawmoyo. Calathe, leşan du gabaydi dılo hoze husrono u dlo mitıstacmıl u medano mqabıl dide, makleli i hadomuthaydi b’HDP. Mede ha tro midıc, i sbuthathe dlatla asirutho bi şrorutho en dhowe bethdino kino ono mamnono dgmihararno mi sbuthathe.