Kamili amuroye di esfirreğlo dımtaybiwo bi qritho d’Midin

A Mıdhoye sımlın yawmo di fsihutho bi qritho mbaraxto cam turnowa di esfirreğlo dmıştawteflela arbac gude di qritho d’Midin.

Bıthır mi turnowathe u camo mcazmowe l’muklo, dhuwo mu gabo da 12 hadome di Sicto du Hudro du Quyomo d’Midın dkıtyo b’Urifi.

Athmıl bıthır ma şoce d’falge d’yawmo, a comure di qritho d’Midın latyimiwo hedor i rawmo di qritho dıgmitamırla Axeke leşan dsaymi yawmo di fsihutho la comure di qritho cama socure dathınwo me Urifi. Bu yawmano mnaqewo 4 gude di esfirreğlo mi qritho, leşan a muroye ubi harayto hayna gudo kaşırto gıdmaydo u koso di turnowathe di qritho.

Bıthır mıd nahıtwo 5 ma hadome di Sicto du Hudro du Quyomo d’Midın li qritho, mtayabwolın yawmo di fsihutho la comure, cal di Sicto mıdwola hawxa fusqono leşan i dmafsıho a comure u dmafiti yawmo basimo camhdode b’şlomo.

Bi qamayto an 4 gude di qritho d’Midın mıştacelın ubi harayto hdo ma gude mıdla u koso u bıthır mşarewolın a hedriyat dmitahwe muklo du grill la comure di qritho kula. Wa zıuze du muklano hiwi ma hadome di Sicto du hudro d’Midin ulo mu hşowo du hudro.

Lu yawmano mıştawtafwole Mor Yuliyos Hanna Aydin da esore baroye di marcitho d’Almanya u Xuroyo Samuel Gumuş d’Vanaykıl, camu kohno di cito d’Midın Şamcun Acar wu kohno di mdito d’Ahlen Yakub Zeren. U mede dıkgorış u zuhoro, an 4 gude di esfirreğlo man abne di qritho d’Midin’wın u hathe krımzo dkito claymutho kaşırto bi qrithathe.

U muklo d’casriye mhaydarwo bi duktho di tarmitho hathto dsimiowa b’Midin cali ramwo. Bıthır mu yawmano di fsihutho hın ma hadire mqadamlın mamlo dmahwelın ebe i fsihuthathe calu yawmano.