Kımdawmi ahfuxye emwothoye mqabıl d’Ankara bi sbutho da hçome dıkmisım calu gabo di HDP

Bu zabno dkımdawmi a hfuxye Emwothoye mqabıl di şultonutho d’Turkiya calu qedomo qaşyo dkıtle u gabo Demoqratoyo da Came, adyawmaste sımle u polis Turkoyo cuqobe u msıkle hol 35 Kurdoye dıkmıthomi bu snodo di PKK.

Elo bu zabno dıkmitahwe hfuxye mqabıl d’Turkiya, i şultonutho d’Erdoğan mzaharla u mawdacla, d’noşo latle zedqo dımdaxıl ba sebwotho gawoye du athro.

Bu zabno dımqarawle uu Newroz d Kurdoye, sımle adyawma u polis Turkoyo cuqobe b’Ankara u b’Stanbul, msıkle 35 farsufe dıkmıthomi bi asirutho dcamu gerilla di PKK. Bebzabno b’cuqobo hreno dsim, msik’ste u mşalo du Hudro da zedqe noşoye d’Turkiya Özturk Turkdoğan.

Bıthır mıd u parlamento d’Turkiya grışwole i hasinutho du qoyumo d’HDP Ömer Faruk Gergerlioğlu u dmabde fulhone leşan dmitaqimo i HDP-dkıtyo u gabo folitiqoyo 3’yo rabo du athro, ba casrowat d’hadome d’HDP rfıdwolın dnufqi mu parlamento xıd protesto. Camathe’ste mbayanla Turkiya lohitho dhol 600 folitiqore di HDP; beynothaye u qoyumo du camaydan Tuma Çelik, dıkubco dmıncolın l’zabno d’5 eşne dımdaxli bu haqlo di siyase du athro.

İ sbuthathe du mnoco di HDP, xlıqla bu şıkılano zmomo rabo u athrawotho frişe krıhlın u qedomano d’Turkiya la gabe saqıbloye. Bıthır me Amerika, u Huyodo d’Urifi, Almanya uğer tukose Emwothoye, ucdo’ste i wazırto di baroyutho du Swed mawdacla, dkıtne hadire dmahti tedbire casye cal Ankara calu qedomano dkıtla li saqıbloyutho. Calathe u Swed, gıdmasır esore caman athrawotho hrene du Huyodo d’Urifi leşan dmitahti a tedbirani cal Turkiya u mawdıc; dhano dyoşo da zedqe du qolo dba milyone dıbnaynoşo’yo.

Elo cala hfuxyani du macırbo mqabıl d’Turkiya, i wazirutho di baroyutho du athro mahwela hfuxyo u sımla qroyto, d’noşo lo mdaxıl ba sebwothayda a gawoye. Lu hfuxyano du macırbo mqabıl di şultonutho d’Turkiya, u rişqutno catiqo Abdullah Gul wu rişono di karxutho d’Stanbul Ekrem İmmamoğlu’ste, krıhlın i siyase cçıqto dıkmaşe u gabo du rişqutno Recep Tayyib Erdoğan-AKP mqabıl di saqıbloyutho u mırlın; Hathe sbutho dıkxudmo i marhıbonutho’yo.