Kino Gabriel rfıdle a idicat dmatilın tayısyotho dılo pilot mu koalisyon emwothoyo

A Haylawotho d’Suriya Demoqratoyto, rfıdlın a tebe dıfrisi dıkmidace ebeye dmatilın tayosyotho dılo pilote ma hayle du koalisyon Emwothoyo dkıtyo bi rişonutho d’Amerika.

 U malolo d’QASAD-Kino Gabriel mırle li dafo d’Rudaw; A idicat dıfrisi bu tboco froso kenşoyo, rahuqe mi şroruthone wu rabhaylawotho du Mawtbo Folhoyo d’Deyr Ezzor’ste kırofadlın.

İ dafo Kurdoyto d’Rudaw sımla athmıl maqıblonutho camu malolo ruşmoyo da Haylawotho d’Suriya Demoqratoyto Kino Gabriel dkıtyo ha ma mşale du Mawtbo Folhoyo Suryoyo d’MFS. Bi maqıblonuthathe dsimo cam Gabriel, rfıdle a tebe dıfrisi ba yawme haroyani bu tboco froso kenşoyo.

Bu mamlayde Gabriel mawdacle, da hayle d’QASAD kamiloyith kırofıd a idicatani, dmatilın tayosyotho dılo pilote ma hayle muttafik du koalisyon Emwothoyo. Gabriel mırle; A idicatani rahuqene mi şrorutho u dılo asasne. Wa tebani, rfidiste mu rabhaylawotho du Mawtbo Folhoyo d’Deyr Ezzor.

A hayle d’QASAD dkıtne a hayle muttafik ihidoye dhuwlın ağuno mşawtıfo camu koalisyon Emwothoyo mi naşfe b’Suriya, matilın buğre, droşe folhoye u snodo folhoyo u noşoyo xıd mathlo mqabıl du virus di Corona. Bi maqıblonuthathe Gabriel, grışleste u zuhoro cala hjome dkımdawmo Turkiya wa marhıbonayda dsaymi bu garbyo d’Suriya.

Bi sbuthathe Gabriel mırle; U mınyono da hjome u da cuqobe oyaroye zayidi u kul dkotheste, zıttır kıhozina a Turkoye wa marhıbonayda bu qlimo. Turkiya kımnasyo dmıstafdo mi lo mşaynutho dkito bu qlimo.Turkiya mabdewola a hjomani bu yarho d’Teşrin u qamoyo da 2019 u kbışwola dukotho frişe du garbyo d’Suriya, meqım mu qyomo di şalyuthzayno dsımwola cam Rusya u Amerika. Elo Turkiya naqla hreto kımdawmo u mhoyayda cala dukotho d’QASAD u Amerika, heş lo mfanela cala dyoşani d’Turkiya.