Kıthiw mimartho rwıhto cali aykanoyutho da mşihoye b’Turkiya

Bi mimartho dıfriso me gelyunoro Turkoyo, bşıkıl rwiho mahkele cala Mşihoye d’Turkiya, i aykanoyuthathe, da citotho u da dayrathe wu qedomo di şultonutho li yortutho da came Mşihoye du athro.

Bi mimarthathe mahke cali jeoğrafia d’Turkiya u aydarbo u camo şerşoyo-Armınoyo, Suryoyo u Yawnoyo bnele u macmarle mdinotho frişe u friş’ste duktho lu Sayfo dsim cala camani mi mamlaxtho da Cuthmanoye.

Gelyunoro Uzay Bulut, frısle mimartho yarıxto cali aykanoyutho du camaydan, dan Armınoye, da Yawnoye uda Mşihoye hrene dıkcayşi b’Turkiya. Bi mimarthathe kmitawdıc, dkıtla adyawma hol 80 milyone dıbnaymothoye, elo a Mşihoye dfayış hol 0.1 ba mo menaye b’Turkiya, matın l’qento dmıqşoci bu athrano. U gelyunoro kımahke calu makthabzabno catiqo dkıtte a Mşihoye u mahkele jeoğrafia da dukothathe u aydarbo mşataslın mdinotho.

Ubu zabno di mamlaxtho da Cuthmanoye, jbiri a Mşihoye dobın jızye umcal fothe du hbosano’ste, mınyono d’camo jbir dqolıb Maşılmono. Cıl mathe kula’ste, friş duktho bi mimarthathe calu qtolğenso sistematik dsim calu camaydan, calan Armınoye u Yawnoye wu haşo rabo dcayışiwo bu zabnawo u aydarbo bıthır sxiri a citotho, a dayre wa madraşyothathe u sim hboso cala nahire ucala rişonathe a tawdithoye wa siyasat dmaşın leşan u fşoro du camo.

Bi mimartho mahke cala citotho catiqotho dımzabni, ğer dmıstacmıli xıd dukane aw stabıl. Bu falqo di mimarthathe dfrişo calu camaydan’ste u gelyunoro kım’akıd du camano-u camo şerşoyo d’Bethnahrin’yo u hawi dıbho la hawbe dsımlın a Turkoye wa Kurdoye aclaye-dilonoyith kle calu Sayfo dan 1915, dhtif, qtil, diş u d’mawfıq u camano ma dukothayde a makthabzabnoye.

Camathe’ste an arcotho wa mulkone du camo Suryoyo d’jbir dımgalwe, kbişi ma comure Maşılmone wa mhaqri, manhıbi u mahrıwi a citothayde a catiqe. Bu falqano’ste mahke calu taşroro du tukoso Emwothoyo The International Christian Concern dmahkewole cala hawbe ucala dyoşe dhawın calu camo Suryoyo ucala dukothayde a makthabzabnoye uhol adyawma’ste, kımdawmi a dyoşani wa hbosani acle.