Kmihathıt u bayto da sobe du cameydan b’Holob

A fulhone du hethotho du Bayto da Sobe du camaydan bi mditho d’Holob b’Suriya mşarelın.

 U hethotho du Bayto da Sobe du camaydan b’Holob dıshıfwo meqım tmone ışne, kmisım bu snodo du mawtbo da citotho du Madınho Mescoyo.

 Yawme d’Huşabo dşaficina, a şırkat du bnoyo mşarewolın a fulhonathe du hethotho du Bayto da Sobe di cito Suryoyto Ortodoksoyto dkıtyo bi mditho d’Holob bu garbiyo d’Suriya.

U benyonano da sobe dmahıt ışme u Bayto di Rahme, kmisım u hethothayde bu snodo momunoyo du mawtbo da citotho du Madınho Mescoyo u mu Kunoşo da citotho d’Hollanda bu taro di tarmitho du bnoyo u hethotho da şutose citonoye dıshifi bu qrobo gawoyo d’Suriya.

Yawme d’şabtho dşaficina, u mathlono fatıryarxoyo di marcitho d’Holob hasyo Mor Bıtrıs Qıssis mdewole uqyomo du hethotho du Bayto da Sobe cam ardixlo Fathi Hayek. U Bayto di Rahme dkıtyo b’Holob kmıhşıw ha ma şutose di tarmitho du bayto d’Hasda.

U benyonano mşataswo mu rişono di marcitho d’Holob dıhtıfwo ba 2013 hasyo Mor Ğriğoryos Yuhanon Abrohom, u dmahwewole haşo rabo bu zabno dıshıfwo bi netije da taxtuşe dhawınwo beyn du rejim d’Suriya u da grube mzayne ba 2012.