10/12/2020

Kmisım duroşe b’Bruksel dmitahıt tedbire qaşye cal Turkiya

A rişone du Huyodo d’Urifi bu knuşyathe adyawma bi mditho d’Bruksel, kdurşi dmitahıt tedbire qaşye cal Turkiya, mi celtho da fulhone lo qonunoye dıksaymo bu madınho du yamo Mescoyo.

 Camgabıdathe, qoyume u rişone d’şutose Urifioye, tlıblın ma mıştawtfone lu knuşyo d’Bruksel, dmahti tedbire qaşye cal Ankara, u dımbayni dactid hatho da esore cam Turkiya.

 A rişone du Huyodo d’Urifi dlayimi adyawma b’Bruksel, kdurşi dmibayın dactid hatho ba esore beyn d’Urifi u Turkiya. Lfuth u masıdro dıkmıdrış bu knuşyano, a rişone du Huyodo  gıdmaydi fusqono haroyo en dgıdmafiti la haye u tehdidathe l’Turkiya dmitahıt tedbire acla aw lo, xıd klayto qrıhto mqabıl da fulhone lo qonunoye du kroxo dcalu ğaz dıksaymo bu yamo d’Qufrus u du Yawnan. Bu knuşyano dgımdawım 2 yawme, kmıdrışste ida dmitahıt tedbire zıttır cal şutose u şırkat u farsufe Turkoye dkıtlın mşalutho cala fulhone lo qonunoye du kroxo dcalu nafto.

U mathlono di siyase baroyto du Huyodo d’Urifi Josep Borel, bi maqırhonutho dhule athmıl lu tboco froso, mawdacle d’Turkiya lo mşahlafla mede bi siyasayda u kımdawmo hul ucdo d’kurxo calu ğaz ba sforyame du madınho du yamo Mescoyo.

Camgabıdathe, u rişono di sictho dıknıfqo mqabıl di marıhbonutho bu parlamento d’Beljika qoyumo Kwin Mitso mawdacle d’Turkiya kdayşo a zedqe noşoye bu garbiyo u bu madınho d’Suriya, u makadle dıknofıl wolitho calu kenşo Ewothoyo dmıctarıf bu medano.

U qoyumo dsımwole socurutho cami taşdarto Beljikoyto la fenyotho du garbiyo udu madınho d’Suriya, bi maqırhonutho dhule l’ANHA, mahkele calu tathir mrimono dhawile u hjomo d’Turkiya wa marhıbonayda cala fenyotho du garbiyo u du madınho d’Suriya, u mawdacle dıklozım u kenşo Emwothoyo dmoyıd tedbire mqabıl du qento dıtrelın ahjomani dıkmdawmi naqla hreto cali fnitho me 09 bu yarho d’Teşrın u Qadmoyo dşaficina u hul ocdo.

Mxasra hreto, u mdabrono du qentrun Emwothoyo d’Bruksel da buhone u da zedqe noşoye Ramadan Abu Jazar, mawdacle da yadıcthone wa mbahnone du qentrun hani ışne b’zuhoro rabo kımcaqbi i aykanoyutho haruto da zedqe noşoye b’Turkiya, dilonoyith adyoşe barbroye dıkmisomi cala gelyunore, dayone, hfite, sniğre u saqıbloye folitiqoye. Bebzabno, u mdabrono du qentrun sımle qroyto la rişone Urifoye dkıtne bu knuşyo d’Bruksel, dmahti tedbire qaşye cal Turkiya u dsaymi hboso rabo acla, bnişo dmakılyo a dyoşani dıkmisomi cala zedqe noşoye.

Me gabo hreno, u waziro di baroyutho d’Fransa Jean-Yves Le Drian mawdacle, dsımlın qroyto l’Turkiya, dobo fuşoqo qriho calu qedomayda lı sebwotho frişe, en kubco dhowela esore mawthrone caman athrawotho du Huyodo d’Urifi. Le Drian mırle lu baramnayde u Turkoyo Mevlut Çavuşoğlu meqım mu knuşyo du Huyodo d’Urifi; En kubcitu dhowalxu esore towe acmayna, klozım dmawdıcitu i klaytathxu ba şwole haroye dhawın celtho dmiwatın a esoraydan.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…