Kothubtho Anna Malle frısla tıre kıthowe hathe

İ kothubtho du cameydan Anna Malle, frısla tıre kıthowe hathe dkıtne mgalyun da nacime wu hreno kıthowo da slawotho da citotho du cameydan.

Bi mawdconutho dmıdlan mi kothubto mırla; A kıthowani mtaybili bu leşono Swedoyo leşan a qaroye dhowelın yulfono cala maşılmonwotho wi mardutho du cameydan.

İ kothubto dkıtla kıthowe mşahılfe dkıtne calu cameydan, ucdo frısla a tıre kıthowani dkıtne ışmaye; taşciyotho mi britho mşihoyto la nacime wu slawotho.

Taşcıyotho mi britho mşihoyto la nacime, kibe ha domır mgalyune bu leşono da nacimeyo kıthiwi bu leşono Swedoyo. Bu kıthowano, kibın a nacime dıyulfi i haymonutho mşihoyto bıleşono fşito da tıloye.

U kıthowo hıreno da slawotho, i kothubto maltamla a slawotho da citotho du cameydan, u bebzabno mahkela cala yadıcthone dkıthuwlın a slawotho, xıd Mor Balay, Mor Yahkub u Mor İshok Ninwoyo.

Aslawothani dkıtne mu makthabzabno qamoyo di mşihoyutho, hol adyawma kımasri u barnoşo b’Aloho ubi Mşihoyutho.