Kowe hfuxye frişe mqabıl du camlo d’Turkiya

Tıre hadome bu mawtbo tahtoyo di kongre d’Amerika, sımlın sturyo ahjome dsımle u gayso d’Turkiya wa marhıbonayde calu garbay madınho d’Suriya wa dyoşe dıksaymi cala zedqe noşoye. Atre mşale Amerikoye mahwelın ilo thnihuthathe calu qedomo d’Turkiya bi sbutho du sistem da soruhe d’S-400 u bi sbutho da fulhone lo qonunoye dıkmisomi bu madınho du yamo Mescoyo.

 Me gabo hreno, u federasyon du parlamento Caraboyo krıhle u gunho dsımla Turkiya, dıqtıcla a maye di Hasake dıknuflo bu garbay madınho d’Suriya.

 U rişono da qutnuthoye bu mawtbo tahtoyo di kongre d’Amerika Maykel Mackol wu rişono di sictho da esore baroye du mawtbo tahtoyo Elyut Engel, bu buyono mşawtıfo dıfrıslın, mahwelın ilo thnihuthathe calu tehdid du qedomo d’Turkiya la esore dkıtla cam Waşington, NATO u camu du madınho du yamo Mescoyo.

A 2 mşale Amerikoye makadlın dıklozım dmitaklın a fulhone d’Turkiya dıkmahrıwi i şalyutho, u mawdaclın dıklozım Waşington dfulho cama bnayqyomayda, cam Urifi u cama athrawotho hadome du NATO bnişo dmitıstacmıl kul şıkıl dımkone, leşan dmıtlıb me Ankara dımşahılfo u qedomayda.

Camgabıdathe, Mackol u Engel sımlın sturyo qaşyo ahjome d’Turkiya calu garbay madınho d’Suriya wa dyoşe dıksaymi a marhıbonayda bu haqlo da zedqe noşoye. A 2  mşale sımlınste sturyo Turkiya bu zawonayda du sistem da soruhe Rusoye d’S-400 dıkmacıq u fulhono du NATO.

Me gabo hreno, u federasyon du parlamento Caraboyo bu buyono dfrısle krıhle u gunho bceldboboyo d’Turkiya dıqtıcla a maye di Hasake u dı dukotho hrene b’Suriya, u sımle qroyto l’Emwotho Mhaydotho, lu kenşo Emwothoyo u la hayle rahome du şlomo, dmahti klayto qrihto mqabıl d’Turkiya. Bebzabno, u federasyon du parlamento Caraboyo tlıble me Ankara dımyaqro a zedqe da athrawotho şbobe, u dmaklıyo baroyo kull şıkıl d’mudaxala ba sebwotho gawoye d’Suriya.

Mxasra hreto, u waziro di baroyutho du Yawnan Nikos Dendiyas mahwele i thnihuthayde cala tedbire dmahtila Amerika cal Turkiya, u mawdacle du Huyodo d’Urifi ucdo fayış kımqadım l’Turkiya xıd qetro dıklıqyole Urifi ulo belhude xıd qetro dkıtla Turkiya camu Yawnan u Qufrus.

Cali sbutho da esore m’watye beyn Fransa u Turkiya, u waziro di baroyutho d’Turkiya Mevlut Çavuşoğlu mawdacle, di şultonutho d’Paris klozım dımşahlıfo i klaytayda bi sbutho da cuqobe dıksaymo Turkiya b’Suriya, leşan Ankara dımcadlo a esorayda cam Paris. Turkiya u Fransa dhawilın mamle harufe mqabıl dhıdode bi sbutho du qedomo d’Turkiya l’Suriya, l’Libya, l’Nagorno Qarabax ula karikature d’Mohammad b’Fransa, hawın celtho d’Paris dsaymo hboso calu Huyodo d’Urifi dmahıt tedbire cal Turkiya.