24/01/2023

LEBNON: Sim lumodo gelyunoro ma sniğre du rişono d’USUP İbrahim Murad dı mid la buqore mu bethdino b’şıkıl dlatyo qonunoyo

Bi arişkoyto d’Lebnon Beyrut, mtayıb knuşyo la gelyunore xıd klayto d’awyutho camu rişono du gabo du Huyodo Suryoyo Tibeloyo d’USUP İbrahim Murad dıkmimıd la buqore mu bethdino b’şıkıl dlatyo qonunoyo. Lu knuşyano mıştawtafle mşale u mathlone d’gabe Mşihoye mşahılfe, uba mowat d’noqufe li sbutho du rişono İbrahim Murad.

24/01/2023

BEYRUT – Cali zminutho dımşadro mu gabo du Huyodo Suryoyo Tibeloyo umu Gbino Mşihoyo d’Lebnon, mtayıb athmıl knuşyo lu tbocofroso xıd snodo la klayotho dıkmahwele u rişono İbrahim Murad dıkmibıc dmitaşe qole cal dıkmtalıb ba zedqe da Mşihoye u b’athro Lebnon şaryo u hiro.

Lu knuşyano mıştawtafle mşale u mathlone mu gabo da Haylawotho Lebnonoye, u gabo da Katayeb Lebnonoye, u gabo da Athronoye Hire, u Lumodo Aminoyo di Federaliye, i Osarto Othuroyto, u gabo da Noture du Arzo, u farsufe şarye idice u hedor 400 farsufe noqufe du rişono İbrahim Murad dlayimi lawğıl u larwal du salon du qentrun gawonoyo du gabo d’USUP. U knuşyano mşarele bu mamlo du futoho dsımla Layla Latte, dımqadamla ebe tawdiyotho la gabe ula tukose dmahwelın u snodathe lu rişono Murad.

Bıthır, u notarrozo gawonoyo d’USUP sniğro Mişel Mallo bu mamlo dsımle mawdacle du bethdino lıkromış mqabıl da gunhe uda dyoşe d’Hizballa, elo u rişono İbrahim Murad kmitahqıb mu bethdino, cal dkımtalıb dmıbne athro, dmitarku sistem di ciyeşe mşawtafto, dminaqe rişqutno hatho l’Lebnon u dmitaslım u zayno dlatyo ruşmoyo lu gayso.

Bebzabno, u rişono du Zawco du Şuhlofo sniğro Eli Mahfud bu mamlo dsımle, maglele calu qedomo lo qonunoyo du bethdino bi sbutho du rişono d’USUP, u mawdacle ste du vidio dıfris ba dafe kenşoye mzawroyo awkith sim ebe teştıcınye mu gabo d’Hizballa dkıtyo kaboşo lu athro d’Lebnon.

Camgabıdathe, u notarrozo gawonoyo du gabo da Noture di Arzo sniğro Maron Alcamil qrele u buyono dıfrısle u Gbino Mşihoyo d’Lebnon xıd klayto di awyutho camu rtişono İbrahim Murad. Alcamil mşayele; Ara manyo dıkmıhçım acle, u gbino Mşihoyo aw di morutho’yo, a Mşihoye aw a Lebnonoye hire kulle. Ubi harayto, u notarrozo gawonoyo du gbino di Morutho leşan d’Lebnon Kamil Şamcun bu mamlayde tlıble mu bethdino dkorıx calu ganoho mıqa dhowe u tamal du medano rabo.