“Ma turone d’Ararat u d’Bethnahrin hulu turo d’Lebnon Sayfo ha.” U Huyodo Suryoyo Tibeloyo gıdmtayıb hfitwotho lu duxrono du Sayfo b’Lebnon
U gabo du Huyodo Suryoyo Tibeloyo (USUP), bi şatathe’ste xıd kull şato gıdmtayıb hfitwotho b’Lebnon, bi cohnutho du duxrono şatonoyo du qtolğenso dan 1915. Calathe, USUP ksoyım qroyto lu camaydan dmıştawtaıf la turgome dgımisomi 23 bu yarhano ba qentrune du gabo dkıtne b’Beyrut u b’Zahle.
BEYRUT – Bu ışmo; “Ma turone d’Ararat ud’Bethnahrin hulu turo d’Lebnon Sayfo ha”, u gabo du Huyodo Suryoyo Tibeloyo, gıdmtayıb 2 turgome bi cohnutho da 107 eşne du qtolğenso dsımwola i mamlaxtho da Cuthmanoye calu camaydan calu camo Armınoyo u Pontusoyo. Yawme d’Şabtho 23 bu yarhano d’Nison, ba 19.00 d’casriye, gıdmtayıb USUP turgomo calu Sayfo bu qentrunayde dkıtyo b’Sad Albuşriye b’Beyrut.
Lu turgomano gıdmıştawtıf mathlone d’gabe folitiqoye u şutose marduthoye da Suryoye Marunoye udan Armınoye. U bebzabno gıdmisım 3 mamle calu Sayfo hem calu makthabzabno u hemste bu haqlo folitiqoyo wu tathir dtrele calu camaydan ucala came Mşihoye du madınho. Beyn da mamlani dgımisomi, kito u mamlo du rişono d’USUP İbrahim Murad.
Camgabıdathe, i sdirutho d’Zahle du gabo USUP gıdmtaybo turgomo hreno calu Sayfo bu qentrunayda dkıtyo b’Zahle. Ulu turgomano dgımitayıb 23 bu yarhano, kito zmine Marunoye u Armınoye, u gıdmisım mamle; beynothaye mu notarrozo gawonoyo d’USUP Mişel Mallo.
U gabo du Huyodo Suryoyo Tibeloyo kısoyım qroyto lu camaydan dıkhoye ba mdinotho d’Beyrut ud’Zahle, dmıştawtıfi la turgomani dcalu qtolğenso dan 1915, bnişo dmınfıq moro la Sohde du camaydan, u dmıtlıb mu ray gawonoyo dbritho dmimıd hşowo me Turkiya.