Mabdin droşe leşan u maşıqlo du şalyuthzayno beyn Isroyel u Hamas

U rişono d’Amerika bu mamlo dsımle athmıl mawdacle, du maşıqlo trayono du qyomo di şalyuthzayno beyn İsroyel u Hamas mabdın wa droşe towo kışufci. Bebzabno mşalo b’Mısır’ste dkıtyo ba droşe di mescoyutho maglele ba 2 yawme dıbqamuthayna gıdmıhthım u maşıqlo qamoyo du qyomo di şalyuthzayno wu mucdo bıdela İsroyel u Hamas ba droşe du maşıqlo da 2. Ba droşani di mescoyutho kito mşale Mısroye ume Qatar. 

Lfuth u plan qamoyo du maşıqlano da 2, kmıntır d’Hamas dmarfe 60 yasire wu İsroyel’ste dmarfıyo a Fleştoye hbişoye ubebzabno, dmıgroşoo mu Xtuto d’Ğaza. Camani’ste heş kmıkle calu şuşoto du nqolo di mcadronutho noşoyto lu camo sniqoyo. Elo adyawma bıthır ma şoce dbıthır me falge d’yawmo, mabuco di mşaynutho d’Mısır mawdacle l’Reuters, di taşdarto İsarloyto dkıtyo b’Qahira, kımnasyo dmawrıxo u zabno du maşıqlo qamoyo l’42 yawme hrene wu Hamas, kırofıd u medano.

Bebzabno İsroyel m’akadla, dlıgmıgroşo mi fnitho di mşaynutho dkıtyo beyn İsroyel u Lebnon u loste mu korridor d’Philadelfi dkıtyo calu thumo d’Mısır. Camathe a hayle d’İsroyel dımkamelın a buhone dcal 7 Teşrin u qamoyo da 2023 maglelın, du gayso latwe makfıyono, lo sımle i wolithayde ulo naçıh dkole qum du hçomo dsımwole Hamas. Awkith, u gayso lo mıdle i mawdconutho wu gzomo d’Hamas bşıkıl triso u calathe’ste, mvayacwolın hol alfo bnaynoşo a hayathe uba mowat d’hrene msikiwo yasire me Hamas.

Bu tarano a hayle İsarloye mawdaclın; dhtıfwo 251 farsufe, 4 yasire cayşiwo b’Ğaza wu 2 hrene bıthır nqiwolın lu Xtuto u kıtwo’ste 2 şlade d’folhe İsarloye dqtiliwo ba 2014. Bu buhono mawdıc, dmarfe 147 ma htife; beynothaye 8 şlade. Heş kito 59 yasire b’Ğaza umani 32 mithe’ne. İsroyel’ste nqila a şlade d’41 u mhararla 8 htife. Mani dkito heş msike-13 folhe’ne u 9 menaye mithe’ne. 5 yasire me athrawotho nuxroye’ne.