Macron hule maqırhonutho lu tboco froso u mawdacle i lo thınihutheyde

A hayle di mşaynutho d’Lebnon, qtilın 13 marhıbone qariwo la thume d’Suriya u msıklın 15 hrene. Bı hjomo hreno dsımlın a marhıbone bu garbyo du athro, qtil 2 folhe Lebnoye u ha marhıbono.

 Bebzabno cali aykanoyutho folitiqoyto harayto d’Lebnon dilonoyith bıthır mi isticfa du rişwazire Mustafa Adib, u rişqutno d’Fransa Emmanuel Macron huwle maqırhonutho lu tboco froso u mawdacle ilo thnihuthayde.

Lfuth i maqırhonutho dıfrısle u gayso d’Lebnon, farsufe mzayne bı radoyto marıslın buğre cal qentrune folhoyo b’Arman-Minya bu garbyo du athro. Bu hjomano dnafıq taxtuşe beynothaye, qtil 2 folhe Lebnonye u ha ma farsufe di radoytathe wa 2 hrene mahzamlın mi duktho. Ba taxtuşe qaşye dhawın bu garbyo d’Lebnon, qtilın a hayle di mşaynutho 13 marhıbone d’Dacış u msıklın 15 hrene.

U hjomano, mşarewole bu zabno da hayle di mşaynutho sımwolın cuqobo cal bayto b’Wadi Khaled dkıtyo qariwo la thume d’Suriya. U ğrobano da marhıbone dsımle u hjomoste, kmişakıl me bnaymothoye d’Lebnon u d’Suriya u masroyo b’Khaled al Tawi dıqtılwo bu şuroyo du yarhano ba taxtuşe dhawınwo cama hayle di mşaynutho d’Lebnon.

Camatheste u waziro du enerji d’İsroyel Yuval Steinitz mawdacle, dkıtne hadire lı dıroşe cam Lebnon bi mescoyutho d’Amerika cali sbutho da thume du yamo beyn da 2 athrawotho. A droşaniste kmıntır dmisomi bu yarho dıbqamuthayna. Hem İsroyel u hemste Lebnon kımdacın cali morutho du thumo dkıtyo 860 kilometre mrabce bu yamo Mescoyo.

Me gabo hreno bıthır mi isticfa du rişwazire d’Lebnon Mustafa Adib athmıl, Fransa mawdacla ilo thınihuthayda wu rişqutno Emmanuel Macron huwle adyawma ba şoce dı casriye maqırhonutho lu tboco froso. Malolo di rişqutnutho mawdacle, d’Fransa masırtoyo bu inisyativano cal dlatyo masro bı farsufo mbayno elo masro b’Lebnon u bu camayda.