Macron u mşale franşoye mestaqbelın Haftar bi erişkeyto b’Paris

U rişqutno dı Fransa Emanuel Macron wa mşale rabe Franşoye mıstaqbelın bi erişkoyto d’Paris, u rişono du gayso athronoyo d’Libya Xalifa Haftar.

 Bi ytawtathe Macron dımakadle dıksonıd a’fulhone d’Libya mqabıl di marıhbonutho, u rişono du gayso Haftar makadleste dgıdhowe masro dmitafito i şalyuthzayno la haye, ida dmiyaqro ma grube mzayne dkıtne cayıd di şultonutho d’Fayız Alsarraj.

Bızminutho ruşmoyto mu rişqutno Emanuel Macron, u rişono du gayso athronoyo d’Libya Xalifa Haftar, athmıl safrayto mati lu qusro d’Elize bi erişkoyto dı Paris, laşan dıdorış aşuşote haroye du nfoqo mqabıl di marıhbonutho wi sbutho di golutho lo qonunoyto.

İ rişqutnutho d’Libya mtayabla qubolo ruşmoyo l’Haftar, bi mıştawtfonutho du rişqutno Macron, u rişono du gayso dı Fransa, atre wazire du sutoro udi gawoyutho u menyono d’rişone folhoye bu gayso Franşoyo.

Bi ytawtathe, Macron mwasafle u dawro rişoyo dıkmıştacele u gayso d’Libya bu snodo da fulhone mqabıl di marıhbonutho, umakadle dıksonıd kulonoyith afulhone dıkmisomi bnişo dmişarıro i şalyutho bu qlimo du madınho mescoyo.

M’gabo hreno, Haftar mawdacle l’Macron dgıdmode calu qyomo di şalyuthzayno u gıdfoyış masro eba, b’şart dmiyaqır ma grube mzayne di şultonutho d’Alwifaq dkımrayşanla Fayız Alsarraj udıkmitıctarıf eba m’Emwotho Mhaydotho.

Fransa kıbco dhowela sahmo bi sbutho d’Libya, mawxaste kımnasyo dmıştacyo dawro mescoyo laşan dşıryo u kriz dımhele u athro mi şato da 2011 udilonoyith dqaşi ba yarhe haroyani bu zabno dmahıtlın a’grube mzayne di şultonutho d’Alwifaq ido cali erişkoyto Tarablos.

Camgabıdathe, u rişono du gayso athronoyo d’Libya Xalifa Haftar sımle adyawma socurutho ruşmoyto li erişkoyto d’Almanya Berlin, ubi lqoyto dhawile cami rişathathro Angela Merkel drışle u kriz d’Libya wa darbone du şroyayde.