Macron yatuw cam Mustafa Alkazimi u cam Neçirvan Barzani

U rişqutno dı Fransa Emanuel Macron athmıl meqım mıd hothım i socuruthayde lu Iraq, yatu camu rişwazire Mustafa Alkazimi u camu rişono du qlimo d’Kurdistan Neçirvan Barzani.

 Alkazimi bi ytawtayde cam Macron, maglele dkito ucdo fulhone dmitacbır u Iraq lu hudro da nathrawotho du nukler.

 Athmıl casriye u rişqutno d’Fransa Emannuel Macron wu rişwazire du Iraq Mustafa Alkazimi bıthır mi ytawto dhawilın camıhdode, sımlın knuşyo mşawtıfo lu tboco froso b’Boğdod. Ba mamlathe, a 2 rişone mahkelın cala tahrazyotho u tarmiyotho momunoye dkito beyn da 2 athrawotho.

Alkazimi bu mamlayde, mawdacle dıdrışle cam Macron i tahrazto du enerji du nukleer du dactid dgıdhuyo leşan sebwotho mşayne, u bi qadmoyuthathe u snoco du kahrobo. Lfuth Alkazimi, i tarmithathe gıdmisomo bu duyoqo du tukoso Emwothoyo du nukleer u di sictho Franşoyto du nukleer. Elo lfuth mabuco folitiqoyo dhadır bi ytawtathe, Macron u Alkazimi drışlın i sbutho dmitadcır u bnoyo di nuqazto d’Tammuz du nukleer dmabdiyowa ban 1976 bi methcadronutho d’şırke Franşoyto, elo İsroyel bu hçomo oyaroyo dsımwola ban 1981 shıfwola i nuqaztathe kulonoyith.

Camgabıdathe, Macron bu mamlo dsımle mawdacle dıdrışle i aykanoyutho du Iraq bu maşıqlano u aydarbo kibe dmitafito la haye i xarita Franşoyto Iraqoyto dımbayno. Macron mawdacleste dıksonıd u maşıqlo du nqolo du Iraq li demoqratoyutho, u makadle d’Fransa hadırtoyo dımamno u mabuce du enerji lu Iraq. Bebzabno, Macron dmawdacle dıdrışle i methcadronutho folhoyto camu Iraq, makadleste du athrayde gıdsonıd a tarmiyotho ulsoye dgıdmisomi bu Iraq, beynothaye u bnoyo du metro d’Boğdod.

Me gabo hreno, Macron dımşadarle egartho d’zuhoro l’Turkiya, makadle dıksonıd i morutho du Iraq mqabıl di mudaxala baroyto dıkmisomo ba sebwotho gawoye du athro, u mırle; Turkiya ksaymo ğalabe mudaxala ba sebwotho gawoye du Iraq.

Mexasra hreto, u rişqutno Franşoyo bi lqoyto dhawile b’Boğdod camu rişono du qlimo d’Kurdistan du Iraq Neçirvan Barzani, makadle du athrayde gdımdawım bu snodo du qlimo.