Mahwe hfuxye mqabıl Turkiya calu şuhlofo di cito d’Kariye l’masığdo

A sturye wa hfuxye mqabıl du şuhlofo da citotho da Mşihoye b’Turkiya l’masığde kımdawmi me athrawotho frişe.

 U Huyodo d’Urifi, Rusya u Yawnan mahwelın hfuxyo mqabıl du şuhlofo di cito d’Kariye l’masığdo mi şıltonutho d’Erdoğan.

 Bıthır mi cito d’Ayasofya dımşahlıfowa mi şultonutho d’Erdoğan l’masığdo da Maşılmone, meqım kımo yawmeste mşahlafwola i cito d’Kariye, dkıtyo duktho makthabzabnoyto l’masığdo. Bıthır mu şuhlofano di cito, hın athrawotho u tukose Emwothoye mahwelın hfuxye mqabıl di şultonutho d’Turkiya.

İ malılto da esore baroye folitiqoye du Huyodo d’Urifi Nabila Masrali, bi mawdconutho dhula lu tboco froso mırla; U Huyodo kımcaqıb a şuşote dkowın b’Turkiya me qariwo. Turkiya klozım dmaydo i mşalutho dkıtla mqabıl du tukoso Emwothoyoo d’UNESCO dkıtle mşalutho cala botay catiqotho wa yurtwotho maktbazabnoye dkito. Be bzabno klozım Turkiya dmaydo i mşaluthayda bu dialog dıklozım dhowe beyn da tawdiyotho.

Bhaq du şuhlofo di citathe, i cito Rusoyto Orthoduksoyto mahwela hfuxyo u mırla; U fusqono dmıdla Turkiya fusqono makiwono  u mahişonoyo. Ayasofya latyo ftıhto lkul noşo, cal dımkaselın a rşome di Mşihoyutho. Ucdoste mşahlaflın cito hreto u hathe kmakiwo u kobo haşo rabo, Bu şıkılano Turkiya kobo sırto da citothani wa rşomani d’camo nuxroyo’ne.

Bi sbuthathe u athro du Yawnanste sımwole sturyo qaşyo Turkiya calu şuhlofo di cito d’Kariye l’masığdo. U qoyumo du gabo d’HDP Garo Paylan bu mamlo dsımle mırle; İ şultonutho kımnasyo dfıthola darbo da qole, bu şuhlofo da citotho l’masığde. Bu şıkılano naqla hreto mıstacmela i tawditho leşan a yuthronayda a folitiqoye.