Maqbılo İrmoyto dımqadmo laşan dmitarkıw bethdino dilonoyo dmıhkomi a marhıbone d’Dacış

Bi maqırhonutho dıfrısle u rişwazire du qlimo d’Kurdistan Masrour Barzani mawdacle, di şultonuthayde maqbela i maqırhonutho di rmoyto dımqadmo lu quwolo.

Bi rmoytathe tlıbwo, dmitarkıw bethdino dilonoyo leşan u hkomo da ğrobe marhıbone d’Dacış.

Athmıl u mawtbo da wazire du qlimo d’Kurdistan kıtwole knuşyo u drışwole i rmoyto dımqadmowa leşan u quwolo. Bıthır mu knuşyano u rişwazire Masrour Barzani frısle maqırhonutho u mahkele calu quwolo dsim cali maqırhonutho di rmoytathe u mawdacle, dfsiq dmitarkıw bethdino dilonoyo b’Arbil leşan u hkomo da ğrobe marhıbone d’Dacış.

Barzani tlıble’ste mu parlamento du qlimo dmahıt u fusqonani bi qadmoyutho da fulhonayde u dmaqbela cal zabno xayifo. Barzani mırle; U nişaydan dmarkıwina bethdino athronoyo leşan dımhaşwina a thimoye d’Dacış ba hawbe du qrobo, ba hawbe noşoye uba hawbe du qtolğenso. Bi rmoytathe tlib’ste snodo mu kenşo Emwothoyo leşan u hkomo da marhıbone ulu snodo da dıbhe.

Masrour Barzani mırle’ste; Bıthır mıd maqbılo u şafico i rmoytathe xıd qonuno, gıdxolıq u fusqonano fulhone qonunoye leşan u hkomo da marhıbone d’Dacış dsımlın hawbe mqabıl da came du qlimo u gawonoyith cala hawbe dsımlın mqabıl di noşutho. Kudcina du bethdinano lıgmanıh a çurhe camuqe da dıbhe-dilonoyith da Ezidoye uda qalilotho hrene, elo darbo’yo lu tlobo du hşowo, huthomo u kinutho’yo.

Bıthır mıd i şultonutho mıdla fusqonano, maslıq lu parlamento elo heş holucdo lo mbayın siqumo leşan dmimıd li ido. Bıthır mi zoxutho dcal Dacış bu Cıraq, a hayle folhoye du Cıraq udu qlimo d’Kurdistan, msıklın mınyono celoyo d’marhıbone dkıtne ucdo ba hbuşye du athro.