Masrıh kohno hatho li cito d’Mor Fetrus u Fawlus bu Sved

Yawme dhuşabo 6 bu yarhano u efetrufo fatıryarxoyo di marcitho du Swed Mor Diyosqoros Benyamen Ataş masrahle kohno hatho li cito d’Mor Fetrus u Fawlus dkıtyo bi mditho d’Trolhettan du Sved.

U şamoşo ewengeloyo Stefanos Guven masrıh lu darğo di kohnutho laşan dımqadım teşmeşto bi cito Suryoyto Ortodoksoyto bi mditho d’Trolhettan.

U zuyohano di kohnutho du Şamoşo Stefanos Hawi bi rişonutho d’Mor Diyosqoros Benyamen Ataş cama Kohne Xuroyo Cabdo Cicek u kohno di cito d’Mor Fetrus u Fawlus Qaşişo Basim Kurt, Abun Qaşişo Cak Nassar u abuna Qaşişo Şlemen Aslan Be Mato u kohne ma citawotho ahwotho u ma citawotho Svedoye.

Abun qaşişo Stefanos Guven mawlıd me abohe Şamcın u Luse bi qritho d’Marbobo elo u babu bu şerşo dkıtyo kfarzoyo, me nıcmuthe qayım bi cito Suryoyto Ortodoksoyto, u qrele u leşono suryoyo qum idothe du mnohnafşo abun xuroyo Marawge Akyuz u bıthır qum idothe d’Abuna qaşişo Basim Kurt dkıtne a kohne di di cito d’Mor Yuhanun d’Göteborg. U bıthır bu dawreyde fayış bi dayro d’Mor Yahkub Dasrux b’Almanya wi dayro d’Mor Awgin b’Swisra bebzabno kımdawım u yulfoneyde u teoloğiya bi madraşto d’Mor İğnatiyos bi mditho d’Södertelje du Swed.

U qaşişo Steyfanos Guven masrıh kohno li cito d’Mor Fetrus u mor Fawlus dkıtyo b’Trollhettan bduktho d’Xuroyo Cabdo Cicek.