Masrour Barzani hawile itawto cam Erdoğan. Bebzabno sim cuqobe ma hayle Turkoye cal qıryawotho d’Nuhadra (Dohuk)

STANBUL – Athmıl mabdele u rişwazire du qlimo d’Kurdistan Masrour Barzani socurutho lu qesro di rişqutnutho dkıtyo b’Stanbul u laqi mşale frişe u bıthır’ste u rişqutno Recep Tayyıb Erdoğan. Elo bu zabno di socuruthathe d’Barzani l’Stanbul, xıd kull naqla dhawi bu dacbar, a hayle Turkoye’ste sımlın cuqobe cal qıryawotho d’Nuhadra (Dohuk).

Ba cuqobani noşo lo qtil, elo hiw husrono rabo lan arcotho u mulkone da comure. U hçomo sim, bnişo dmımhe u gerilla di PKK’we, wi socuruthathe d’Barzani simo bu taro du plan dkito beyn Turkiya wu qlimo d’Kurdistan, dsaymi cuqobe mşawtıfe calu gerilla bu garbyo du Cıraq. 26 bu yarho d’şafıcina, mawdacwola i Sictho da esore baroye d’Kurdistan, d’Turkiya kıtla plan dmabdo cuqobe haroye calu qlimo bi methcadronutho di KDP.

Me 23 bu yarho d’Nison da 2020, kımdawmi a hçome d’Turkiya cala dukotho da mdinoye bu garbyo du Cıraq. Ba droşe dhawın beyn Barzani u Erdoğan’ste kle cala şuşote haroye du Cıraq udu qlimo wi sbutho di methcadronutho dıbeynothaye. Ankara bi fotho kımahwıyo u snodayda la Kurdoye du qlimo d’Kurdistan, elo u qedomathe frişo u saqıbloyo’yo.

Bi ytawtathe d’Barzani u d’Erdoğan u mede d’grışle u zuhoro du tboco froso, di otho du qlimo d’Kurdistan lo mahtowa bıthre d’Barzani bu zabno di maqırhonutho dhuwolın a 2 rişone. Xıd kıtyo cyodo du protokol, kull rişono aw mathlono d’athro, klozım dmitahto i otho du athrayde bıthre. Camathe’ste u rişqutno Erdoğan lo yatıw mqabıl d’Barzani elo mawtawle u rişono da istixbarat Hakan Fidan mqabıl dide, u hathe kmifaşqo xıd tahdid lu qlimo d’Kurdistan.