Mawtbo Umthoyo d’Bethnahrın: Klozım mitakılyo i siyase du qtolğınzo du gabo di AKP u MHP.

U Mawtbo Umthoyo d’Bethnahrın frısle buyono dıg korıh a hcome dıksaymo calu garbyo u madınho d’Suriya u calu garbyo du İraq. MUB bu buyoneyde komır; Klozım mitakılyo i siyase du qtolğınzo du gabo di AKP u MHP.

———— buyono ————

A şultonwotho di Qutnutho d’Turkiya kmaydi l’ruhayye asas i siyase du maşıqlo haroyo di Mamlakhto da Othmanoye wu strateji du lhoyo udu tenkiro di Knuşto d’İttihat – Terakki, dkıtle nişo dqışci a came bkul şıkıl darbone. İ siyasathe du cnufyo camu inqilab folhoyo dsim bi şato dan 1980 bı 12 İlul hol adyawma bşıkılat mşahılfe mawrıwo u kımdawmo. Dilonoyo ba 90’yat sim ba olufe faali meçhul, u kenşo kulonoyo mazıc u mnase dmimıd tahtu kontrol. Bu maşıqlano mu camo Suryoyo ba casrowat farsufe qtili, mınyono dı dkotho dıkhoyın bınne ba cuqobe folhoye dıkmisomi bgawıd d’Turkiya u larwal dı Turkiya maxlın.

Bıthır mu jerobo du inqilab folhoyo bu siqumo d’15 Tamuz 2016, mşare dmitanhıt la haye tahrazyotho u xayale di Othmanliye hathto. Bu ittifaq d’AKP – MHP mşakıl mdabronutho anti demoqratik u faşist, u sim hjome mqabıl da came udi saqıbloyutho. Me Libya hol Karabağ mazidi a hjome du kboşo udu tehriwo. B’Suriya ubu Iraq wahde mşahılfe kbişi u marku nuqazyotho folhoye. Dilonoyo ğalabe qıryawotho du camaydan dkıtne ba wahde d’Behdinan, Kanimasi u Gare ba hjome dsimi ba foqocotho mahrıwi u maxlın. Ba hjome du kboşo dsimi calu Garbiyo – Madınho d’Suriya sim qtolcame rabe. Ba mo alfowat dıbnaynoşo fayişi jbiroye dnıfqi ma dkothaththe. U camo Suryoyo – Othuroyo – Kaldoyo – Oromoyo bu qrobano du lhoyo hzele husrone rabe. Midıd a qıryawotho du camaydan du qlimo du Khabur kul  yawmo kmisım hjomo aclayye bu zayno, uba foqoctho mi hawa mu taraf du Gayso Turkoyo uma çatawiyayde

İ şultonutho tuhmonoyto d’AKP – MHP leşan dımdawmi i şultonuthaththe, marwahhe u taro du hjomaththe. Bu siqumo d’17 Nison 2022 mabde qrobo rwiho cala qlime d’Zap, Avaşin, Şigor u calu Garbiyo – Madınho d’Suriya. Caynothıd dı britho dkıtyo calu qrobo d’Rusya u Ukrayna, i şultonutho d’AKP – MHP hzelın i aykanoyuthathe fırsa, kımnasın dı turi u sıbyono da came, u dlohın a dinamike du darqıblo. İ Qutnutho d’Turkiya bu makhabzabnayda kula a şultonwotho dathın li rişonutho maşelın siyase, dqışçi u camo Suryoyo wa came hrene du qlimo bu darbo du cnufyo, du tefşiro, du tewfiqo mu athro. Xıd Mawtbo Umthoyo d’Bethnahrin, bqaşyutho kırhina i siyase du qrobo d’AKP – MHP, wi zıhniyaththe cal kımşakli qento rabo la came du qlimo, la timoyotho demoqratoye, li hirutho, uli noşutho. Me gabo hreno ksaymina qroyto lu camaydan ulu ray gawonoyo dı britho dmahwın u hfuxyaththe bı hfitwotho demoqratoye leşan dmitakle u qrobano du lhoyo.

———— htomo ————